# Περὶ παρωνύμων 2.423

Aelius Herodianus, Περὶ παρωνύμων, Chapter 2. Ancient Greek.

Canonical: https://interlinea.aeterna-institute.org/library/greek/aelius-herodianus/text-16/2.423

Ἄγκυρα. τὸ ἐθνικὸν Ἀγκυρανόϲ. τὰ εἰϲ νοϲ ἐθνικά, ἐὰν ἀπὸ τῆϲ γενικῆϲ τοῦ πρωτοτύπου γένοιτο καθαρευούϲηϲ, τῷ α παραλήγει μακρῷ καὶ μιᾷ ϲυλλαβῇ τῆϲ γενικῆϲ περιττεύει, οὐκ ἀναϲτρέφοντοϲ τοῦ λόγου. οὐ γὰρ ὅϲα τὸ α κατὰ τὴν παραλήγουϲαν ἔχει, ταῦτα ἐκ θηλυκῶν παρῆκται. τοῦ μὲν προτέρου παραδείγματα ταῦτα, Ἀϲιανόϲ, Καρδιανόϲ, Ὀλβιανόϲ, Φαϲιανόϲ ἀπὸ τῆϲ Φάϲιοϲ πόλεωϲ, Τράλλιοϲ Τραλλιανόϲ, Ϲάρδιοϲ Ϲαρδιανόϲ, τοῦ δὲ δευτέρου Πάριον Παρίου Παριανόϲ, Βοϲπορίου Βοϲποριανόϲ (ἀπὸ τῶν ἐθνικῶν ἐθνικά, ὡϲ τοῦ Ῥοδίου τὸ Ῥοδιακόϲ κτητικὸν καὶ Ϲαμίου τὸ Ϲαμιακόϲ), Κίου πόλεωϲ Μυϲίαϲ Κιανόϲ, Τίου Τιανόϲ, Καρίου Καριανόϲ, Ϲηλυμβρίου Ϲηλυμβριανόϲ. ἡμάρτηται τὸ Βοτρυηνόϲ, ἐπεὶ ἀπὸ τοῦ Βότρυοϲ γέγονεν. ἐντεῦθεν δὲ ὁ τύποϲ μιᾷ περιττεύει, ϲπανίωϲ δὲ δυϲίν, ὡϲ τὸ Ταυριανόϲ καὶ Ϲκορπιανόϲ καὶ Ζυγιανόϲ, ἅπερ ἀπὸ τῶν Ϲκόρπων καὶ Ταύρων καὶ ζυγῶν παράγεϲθαι δοκοῦϲι, δυνάμενα καὶ αὐτὰ ἀπὸ τῶν προτέρων παράγεϲθαι τοπικῶν, Ζυγίων, Ϲκορπίων, Ταυρίων. πρόϲκειται «οὐκ ἀντιϲτρέφοντοϲ τοῦ λόγου» διὰ τὸ Ἱϲπανόϲ, Καρμανόϲ, Καμπανόϲ, Γερμανόϲ, Βρεττανόϲ, Ὠρητανόϲ, Ἀφρικανόϲ, Ἀλβανόϲ, Ὑρκανόϲ. οὐδὲν γὰρ τούτων ἀπὸ γενικῆϲ καθαρευούϲηϲ.

---

Herodianus, Περὶ παρωνύμων, ed. August Lentz. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg0087.tlg026.local001/.