# De barbarismo et soloecismo ΠΕΡΙ ΣΟΛΟΙΚΙΣΜΟΥ.

Anonymi de Barbarismo et Soloecismo, De barbarismo et soloecismo, ΠΕΡΙ ΣΟΛΟΙΚΙΣΜΟΥ.. Ancient Greek.

Canonical: https://interlinea.aeterna-institute.org/library/greek/anonymi-de-barbarismo-et-soloecismo/de-barbarismo-et-soloecismo/%CE%A0%CE%95%CE%A1%CE%99%20%CE%A3%CE%9F%CE%9B%CE%9F%CE%99%CE%9A%CE%99%CE%A3%CE%9C%CE%9F%CE%A5.

Σολοικισμός ἐστι λόγος περὶ τὴν σύνταξιν τῶν λέξεων ἡμαρτημένος. Διαφέρει δὲ Σχήματος· ἐπεὶ τὸ μὲν Σχῆμα ἔχει τινὰ αἰτίαν εὔλογον καθισταμένην εἰς εὐπρέπειαν, ὁ δὲ Σολοικισμὸς οὐκ ἔχει. Γίνεται δὲ ὁ Σολοικισμὸς ἐν τῷ λόγῳ, περὶ πλεονασμὸν λέξεως, περὶ ἔνδειαν, περὶ ἐναλλαγὴν, περὶ εἶδος, περὶ γένος, περὶ ἄρθρον, περὶ ἀριθμὸν, περὶ πτῶσιν, περὶ πρόσωπον, περὶ χρόνον, περὶ διάθεσιν, περὶ ἔγκλισιν. Λέγεται δὲ Σολοικισμὸς, ἐπεὶ σόλοικον καὶ βάρβαρον τὴν προφορὰν ἔχει· Σολοίκους δὲ ἔλεγον οἱ παλαιοὶ τοὺς βαρβάρους. ὁ γὰρ Ἀνακρέων φησὶ, Κοίμισον δὲ σόλοικον φθόγγον. καὶ Ἱππώναξ, Καὶ τοὺς σολοίκους ἢν λάβωσι, περνᾶσι Φρύγας μὲν εἰς Μίλητον ἀλφιτεύσοντας.

---

Anonymi de Barbarismo et Soloecismo, De barbarismo et soloecismo, ed. Ludwig Caspar Valckenaer. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg1129.tlg001.local001/.