# Περὶ συντάξεως 110

Apollonius Dyscolus, Περὶ συντάξεως, ΠΕΡΙ ΣΥΝΤΑΞΕΩΣ ΒΙΒΛΙΟΝ Α. Ancient Greek.

Canonical: https://interlinea.aeterna-institute.org/library/greek/apollonius-dyscolus/text-3/110

Ϲυμφέρεται τοῖϲ ὀνόμαϲι καὶ ἡ τῶν μετοχῶν ϲύνταξιϲ, καθ᾿ ὃν ἐπεδείξαμεν λόγον ἐν τῷ περὶ μετοχῶν. μετὰ μὲν οὖν κυρίων, ἡνίκα οὕτω φαμέν, ὁ Πτολεμαῖοϲ γυμναϲιαρχήϲαϲ ἐτιμήθη, ὁ Διονύϲιοϲ τυραννήϲαϲ ἐμέμφθη, ὅπερ καὶ χωρὶϲ ἄρθρου τὸν αὐτὸν λόγον ϲυγκλείει. καὶ ἡ μὲν τοιαύτη ϲύνταξιϲ χρονικῶϲ νοεῖται, μετὰ τὸ γυμναϲιαρχῆϲαι ἐτιμήθη, μετὰ τὸ τυραννῆϲαι6 ἐμέμφθη. εἰ δὲ αἱ μετοχαὶ προϲλάβοιεν τὰ ἄρθρα, πλειόνων Πτολεμαίων ἐμφάνιϲιϲ νοεῖται, ὥϲτε οὐκ ἀπιθάνωϲ ἔϲτιν φάναι ὡϲ τὰ ἑνικὰ ἄρθρα παρεμφαίνειν καὶ πλῆθοϲ. εἰ γὰρ τῇδέ τιϲ ἀποφαίνοιτο, ὁ γυμναϲιαρχήϲαϲ Πτολεμαῖοϲ ἐτιμήθη, οὐχ ἕνα δηλώϲει Πτολεμαῖον, πλείοναϲ δέ, ἐξ ὧν ὁ εἷϲ τιμῆϲ μετέλαβεν. ὅτι γὰρ τὸ ἄρθρον αἴτιόν ἐϲτιν τῆϲ παρεμφάϲεωϲ τοῦ πλήθουϲ, ϲυμφανὲϲ ἐκ τοῦ ἀποβαλλομένου ἄρθρου· ὁ γυμναϲιαρχήϲαϲ Πτολεμαῖοϲ ἐτιμήθη, καὶ πάλιν τοῦ ἑνὸϲ νοουμένου Πτολεμαίου, γυμναϲιαρχήϲαϲ Πτολεμαῖοϲ ἐτιμήθη. —

---

Apollonius Dyscolus, Περὶ συντάξεως, ed. Gustav Uhlig. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg0082.tlg004.local001/.