# Σφῆκες 7.760-804

Aristophanes, Σφῆκες, Episode 7, lines 7.760-7.804. Ancient Greek.

Canonical: https://interlinea.aeterna-institute.org/library/greek/aristophanes/text-11/7.760

ἴθʼ ὦ πάτερ πρὸς τῶν θεῶν ἐμοὶ πιθοῦ.
τί σοι πίθωμαι; λέγʼ ὅ τι βούλει πλὴν ἑνός.
ποίου; φέρʼ ἴδω.
τοῦ μὴ δικάζειν. τοῦτο δὲ
Ἅιδης διακρινεῖ πρότερον ἢ ʼγὼ πείσομαι.
σὺ δʼ οὖν, ἐπειδὴ τοῦτο κεχάρηκας ποιῶν,
ἐκεῖσε μὲν μηκέτι βάδιζʼ, ἀλλʼ ἐνθάδε
αὐτοῦ μένων δίκαζε τοῖσιν οἰκέταις.
περὶ τοῦ; τί ληρεῖς;
ταὔθʼ ἅπερ ἐκεῖ πράττεται·
ὅτι τὴν θύραν ἀνέῳξεν ἡ σηκὶς λάθρᾳ,
ταύτης ἐπιβολὴν ψηφιεῖ μίαν μόνην.
πάντως δὲ κἀκεῖ ταῦτʼ ἔδρας ἑκάστοτε.
καὶ ταῦτα μέν νυν εὐλόγως, ἢν ἐξέχῃ
ἕλη κατʼ ὄρθρον, ἡλιάσει πρὸς ἥλιον·
ἐὰν δὲ νείφῃ, πρὸς τὸ πῦρ καθήμενος·
ὕοντος εἴσει· κἄν ἔγρῃ μεσημβρινός,
οὐδείς σʼ ἀποκλῄσει θεσμοθέτης τῇ κιγκλίδι.
τουτί μʼ ἀρέσκει.
πρὸς δὲ τούτοις γʼ, ἢν δίκην
λέγῃ μακράν τις, οὐχὶ πεινῶν ἀναμενεῖς
δάκνων σεαυτὸν καὶ τὸν ἀπολογούμενον.
πῶς οὖν διαγιγνώσκειν καλῶς δυνήσομαι
ὥσπερ πρότερον τὰ πράγματʼ ἔτι μασώμενος;
πολλῷ γʼ ἄμεινον· καὶ λέγεται γὰρ τουτογί,
ὡς οἱ δικασταὶ ψευδομένων τῶν μαρτύρων
μόλις τὸ πρᾶγμʼ ἔγνωσαν ἀναμασώμενοι.
ἀνά τό με πείθεις. ἀλλʼ ἐκεῖνʼ οὔπω λέγεις,
τὸν μισθὸν ὁπόθεν λήψομαι.
παρʼ ἐμοῦ.
καλῶς,
ὁτιὴ κατʼ ἐμαυτὸν κοὐ μεθʼ ἑτέρου λήψομαι.
αἴσχιστα γάρ τοί μʼ ἠργάσατο Λυσίστρατος
ὁ σκωπτόλης. δραχμὴν μετʼ ἐμοῦ πρώην λαβὼν
ἐλθὼν διεκερματίζετʼ ἐν τοῖς ἰχθύσιν,
κἄπειτʼ ἐνέθηκε τρεῖς λοπίδας μοι κεστρέων·
κἀγὼ ʼνέκαψʼ· ὀβολοὺς γὰρ ᾠόμην λαβεῖν·
κᾆτα βδελυχθεὶς ὀσφρόμενος ἐξέπτυσα·
κᾆθʼ εἷλκον αὐτόν.
ὁ δὲ τί πρὸς ταῦτʼ εἶφʼ;
ὅ τι;
ἀλεκτρυόνος μʼ ἔφασκε κοιλίαν ἔχειν·
ταχὺ γοῦν καθέψεις τἀργύριον, ἦ δʼ ὃς λέγων.
ὁρᾷς ὅσον καὶ τοῦτο δῆτα κερδανεῖς.
οὐ πάνυ τι μικρόν. ἀλλʼ ὅπερ μέλλεις ποίει.
ἀνάμενέ νυν· ἐγὼ δὲ ταῦθʼ ἥξω φέρων.
ὅρα τὸ χρῆμα, τὰ λόγιʼ ὡς περαίνεται.
ἠκηκόη γὰρ ὡς Ἀθηναῖοί ποτε
δικάσοιεν ἐπὶ ταῖς οἰκίαισι τὰς δίκας,
κἀν τοῖς προθύροις ἐνοικοδομήσοι πᾶς ἀνὴρ
αὑτῷ δικαστηρίδιον μικρὸν πάνυ,
ὥσπερ Ἑκάταιον, πανταχοῦ πρὸ τῶν θυρῶν.

---

Aristophanes, Σφῆκες, ed. F. W. Hall, W. M. Geldart. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg0019.tlg004.local001/.