Ancient Greek · ~8 min
Choral 5
Aristophanes, Ἐκκλησιάζουσαι 5.2
Not analysed yet
αὕτη πόθεν ἥκεις Πραξαγόρα;
τί δʼ ὦ μέλε
σοὶ τοῦθʼ;
ὅ τί μοι τοῦτʼ ἔστιν; ὡς εὐηθικῶς.
οὔτοι παρὰ τοῦ μοιχοῦ γε φήσεις.
οὐκ ἴσως
ἑνός γε.
καὶ μὴν βασανίσαι τουτί γέ σοι
ἔξεστι.
πῶς;
εἰ τῆς κεφαλῆς ὄζω μύρου.
τί δʼ; οὐχὶ βινεῖται γυνὴ κἄνευ μύρου;
οὐ δῆτα τάλαν ἔγωγε.
πῶς οὖν ὄρθριον
ᾤχου σιωπῇ θοἰμάτιον λαβοῦσά μου;
γυνή μέ τις νύκτωρ ἑταίρα καὶ φίλη
μετεπέμψατʼ ὠδίνουσα.
κᾆτʼ οὐκ ἦν ἐμοὶ
φράσασαν ἰέναι;
τῆς λεχοῦς δʼ οὐ φροντίσαι
οὕτως ἐχούσης ὦνερ;
εἰποῦσάν γέ μοι.
ἀλλʼ ἔστιν ἐνταῦθά τι κακόν.
μὰ τὼ θεὼ
ἀλλʼ ὥσπερ εἶχον ᾠχόμην· ἐδεῖτο δὲ
ἥπερ μεθῆκέ μʼ ἐξιέναι πάσῃ τέχνῃ.
εἶτʼ οὐ τὸ σαυτῆς ἱμάτιον ἐχρῆν σʼ ἔχειν;
ἀλλʼ ἔμʼ ἀποδύσασʼ ἐπιβαλοῦσα τοὔγκυκλον
ᾤχου καταλιποῦσʼ ὡσπερεὶ προκείμενον,
μόνον οὐ στεφανώσασʼ οὐδʼ ἐπιθεῖσα λήκυθον.
ψῦχος γὰρ ἦν, ἐγὼ δὲ λεπτὴ κἀσθενής·
ἔπειθʼ ἵνʼ ἀλεαίνοιμι, τοῦτʼ ἠμπεσχόμην·
σὲ δʼ ἐν ἀλέᾳ κατακείμενον καὶ στρώμασιν
κατέλιπον ὦνερ.
αἱ δὲ δὴ Λακωνικαὶ
ᾤχοντο μετὰ σοῦ κατὰ τί χἠ βακτηρία;
ἵνα θοἰμάτιον σώσαιμι, μεθυπεδησάμην
μιμουμένη σε καὶ κτυποῦσα τοῖν ποδοῖν
καὶ τοὺς λίθους παίουσα τῇ βακτηρίᾳ.
οἶσθʼ οὖν ἀπολωλεκυῖα πυρῶν ἑκτέα,
ὃν χρῆν ἔμʼ ἐξ ἐκκλησίας εἰληφέναι;
μὴ φροντίσῃς· ἄρρεν γὰρ ἔτεκε παιδίον.
ἡκκλησία;
μὰ Δίʼ ἀλλʼ ἐφʼ ἣν ἐγᾠχόμην.
ἀτὰρ γεγένηται;
ναὶ μὰ Δίʼ. οὐκ ᾔδησθά με
φράσαντά σοι χθές;
ἄρτι γʼ ἀναμιμνῄσκομαι.
οὐδʼ ἄρα τὰ δόξαντʼ οἶσθα;
μὰ Δί ἐγὼ μὲν οὔ.
κάθησο τοίνυν σηπίας μασωμένη.
ὑμῖν δέ φασι παραδεδόσθαι τὴν πόλιν.
τί δρᾶν; ὑφαίνειν;
οὐ μὰ Δίʼ ἀλλʼ ἄρχειν.
τίνων;
ἁπαξαπάντων τῶν κατὰ πόλιν πραγμάτων.
νὴ τὴν Ἀφροδίτην μακαρία γʼ ἄρ ἡ πόλις
ἔσται τὸ λοιπόν.
κατὰ τί;
πολλῶν οὕνεκα.
οὐ γὰρ ἔτι τοῖς τολμῶσιν αὐτὴν αἰσχρὰ δρᾶν
ἔσται τὸ λοιπόν, οὐδαμοῦ δὲ μαρτυρεῖν,
οὐ συκοφαντεῖν—
μηδαμῶς πρὸς τῶν θεῶν
τουτὶ ποιήσῃς μηδʼ ἀφέλῃ μου τὸν βίον.
ὦ δαιμόνιʼ ἀνδρῶν τὴν γυναῖκʼ ἔα λέγειν.
μὴ λωποδυτῆσαι, μὴ φθονεῖν τοῖς πλησίον,
μὴ γυμνὸν εἶναι μὴ πένητα μηδένα,
μὴ λοιδορεῖσθαι, μὴ ʼνεχυραζόμενον φέρειν.
νὴ τὸν Ποσειδῶ μεγάλα γʼ, εἰ μὴ ψεύσεται.
ἀλλʼ ἀποφανῶ τοῦθʼ, ὥστε σέ τέ μοι μαρτυρεῖν
καὶ τοῦτον αὐτὸν μηδὲν ἀντειπεῖν ἐμοι.