Ancient Greek · ~7 min
Agon 6, lines 6.3.647-6.3.675b
Aristophanes, Ἐκκλησιάζουσαι 6.3.647-675b
Not analysed yet
εἴ σε φιλήσειεν Ἀρίστυλλος φάσκων αὑτοῦ πατέρʼ εἶναι.
οἰμώζοι γʼ ἂν καὶ κωκύοι.
σὺ δέ γʼ ὄζοις ἂν καλαμίνθης,
ἀλλʼ οὗτος μὲν πρότερον γέγονεν πρὶν τὸ ψήφισμα γενέσθαι,
ὥστʼ οὐχὶ δέος μή σε φιλήσῃ.
δεινὸν μέντἂν ἐπεπόνθη.
τὴν γῆν δὲ τίς ἔσθʼ ὁ γεωργήσων;
οἱ δοῦλοι. σοὶ δὲ μελήσει,
ὅταν ᾖ δεκάπουν τὸ στοιχεῖον, λιπαρὸν χωρεῖν ἐπὶ δεῖπνον.
περὶ δʼ ἱματίων τίς πόρος ἔσται; καὶ γὰρ τοῦτʼ ἔστιν ἐρέσθαι.
τὰ μὲν ὄνθʼ ὑμῖν πρῶτον ὑπάρξει, τὰ δὲ λοίφʼ ἡμεῖς ὑφανοῦμεν.
ἓν ἔτι ζητῶ· πῶς ἤν τις ὄφλῃ παρὰ τοῖς ἄρχουσι δίκην τῳ,
πόθεν ἐκτείσει ταύτην; οὐ γὰρ τῶν κοινῶν γʼ ἐστὶ δίκαιον.
ἀλλʼ οὐδὲ δίκαι πρῶτον ἔσονται.
τουτὶ τοὔπος σʼ ἐπιτρίψει.
κἀγὼ ταύτην γνώμην ἐθέμην· τοῦ γὰρ τάλαν οὕνεκʼ ἔσονται;
πολλῶν οὕνεκα νὴ τὸν Ἀπόλλω· πρῶτον δʼ ἑνὸς οὕνεκα δήπου,
ἤν τις ὀφείλων ἐξαρνῆται.
πόθεν οὖν ἐδάνεισʼ ὁ δανείσας
ἐν τῷ κοινῷ πάντων ὄντων; κλέπτων δήπουʼ στʼ ἐπίδηλος.
νὴ τὴν Δήμητρʼ εὖ γε διδάσκεις. τουτὶ τοίνυν φρασάτω μοι,
τῆς αἰκείας οἱ τύπτοντες πόθεν ἐκτείσουσιν, ἐπειδὰν
εὐωχηθέντες ὑβρίζωσιν; τοῦτο γὰρ οἶμαί σʼ ἀπορήσειν.
ἀπὸ τῆς μάζης ἧς σιτεῖται· ταύτης γὰρ ὅταν τις ἀφαιρῇ,
οὐχ ὑβριεῖται φαύλως οὕτως αὖθις τῇ γαστρὶ κολασθείς.
οὐδʼ αὖ κλέπτης οὐδεὶς ἔσται;
πῶς γὰρ κλέψει μετὸν αὐτῷ;
οὐδʼ ἀποδύσουσʼ ἄρα τῶν νυκτῶν;
οὐκ ἢν οἴκοι γε καθεύδῃς,
οὐδʼ ἤν γε θύραζʼ ὥσπερ πρότερον· βίοτος γὰρ πᾶσιν ὑπάρξει.
ἢν δʼ ἀποδύῃ γʼ, αὐτὸς δώσει. τί γὰρ αὐτῷ πρᾶγμα μάχεσθαι;
ἔτερον γὰρ ἰὼν ἐκ τοῦ κοινοῦ κρεῖττον ἐκείνου κομιεῖται.
οὐδὲ κυβεύσουσʼ ἆρʼ ἄνθρωποι;
περὶ τοῦ γὰρ τοῦτο ποιήσει;
τὴν δὲ δίαιταν τίνα ποιήσεις;
κοινὴν πᾶσιν. τὸ γὰρ ἄστυ
μίαν οἴκησίν φημι ποιήσειν συρρήξασʼ εἰς ἓν ἅπαντα,
ὥστε βαδίζειν ὡς ἀλλήλους.
τὸ δὲ δεῖπνον ποῦ παραθήσεις;