Ancient Greek · ~2 min
Choral 6
Euripides, Ἰφιγένεια ἐν Ταύροις 6.1-2
Not analysed yet
ὦ πολλαὶ δακρύων λιβάδες,
αἳ παρηίδας εἰς ἐμὰς
ἔπεσον, ἁνίκα πύργων
ὀλομένων ἐν ναυσὶν ἔβαν
πολεμίων ἐρετμοῖσι καὶ λόγχαις.
ζαχρύσου δὲ διʼ ἐμπολᾶς
νόστον βάρβαρον ἦλθον,
ἔνθα τᾶς ἐλαφοκτόνου
θεᾶς ἀμφίπολον κόραν
παῖδʼ Ἀγαμεμνονίαν λατρεύ-
ω βωμούς τʼ οὐ μηλοθύτας,
ζηλοῦσʼ ἄταν διὰ παν-
τὸς δυσδαίμονʼ· ἐν γὰρ ἀνάγ-
καις οὐ κάμνεις σύντροφος ὤν.
μεταβάλλει δυσδαιμονία·
τὸ δὲ μετʼ εὐτυχίας κακοῦ-
σθαι θνατοῖς βαρὺς αἰών.