Ancient Greek · ~2 min
Choral 8
Euripides, Φοίνισσαι 8.1
Not analysed yet
ἔβας ἔβας,
ὦ πτεροῦσσα, γᾶς λόχευμα
νερτέρου τʼ Ἐχίδνας,
Καδμείων ἁρπαγά,
πολύφθορος πολύστονος
μειξοπάρθενος,
δάιον τέρας,
φοιτάσι πτεροῖς
χαλαῖσί τʼ ὠμοσίτοις·
Διρκαίων ἅ ποτʼ ἐκ
τόπων νέους πεδαίρουσʼ
ἄλυρον ἀμφὶ μοῦσαν
ὀλομέναν τʼ Ἐρινὺν
ἔφερες ἔφερες ἄχεα πατρίδι
φόνια· φόνιος ἐκ θεῶν
ὃς τάδʼ ἦν ὁ πράξας.
ἰάλεμοι δὲ ματέρων,
ἰάλεμοι δὲ παρθένων
ἐστέναζον οἴκοις·
ἰηιήιον βοάν,
ἰηιήιον μέλος,
ἄλλος ἄλλʼ ἐπωτότυζε
διαδοχαῖς ἀνὰ πτόλιν.
βροντᾷ δὲ στεναγμὸς
ἀχά τʼ ἦν ὅμοιος,
ὁπότε πόλεος ἀφανίσειεν
ἁ πτεροῦσσα παρθένος τινʼ ἀνδρῶν.