Ancient Greek · ~2 min
Episode 9, lines 9.1270-9.1283
Euripides, Φοίνισσαι 9.1270-1283
Not analysed yet
τίνʼ, ὦ τεκοῦσα μῆτερ, ἔκπληξιν νέαν
φίλοις ἀυτεῖς τῶνδε δωμάτων πάρος;
ὦ θύγατερ, ἔρρει σῶν κασιγνήτων βίος.
πῶς εἶπας;
αἰχμὴν ἐς μίαν καθέστατον.
οἲ ʼγώ, τί λέξεις, μῆτερ;
οὐ φίλʼ, ἀλλʼ ἕπου.
ποῖ, παρθενῶνας ἐκλιποῦσʼ;
ἀνὰ στρατόν.
αἰδούμεθʼ ὄχλον.
οὐκ ἐν αἰσχύνῃ τὰ σά.
δράσω δὲ δὴ τί;
συγγόνων λύσεις ἔριν.
τί δρῶσα, μῆτερ;
προσπίτνουσʼ ἐμοῦ μέτα.
ἡγοῦ σὺ πρὸς μεταίχμιʼ· οὐ μελλητέον.
ἔπειγʼ ἔπειγε, θύγατερ· ὡς, ἢν μὲν φθάσω
παῖδας πρὸ λόγχης, οὑμὸς ἐν φάει βίος·
θανοῦσι δʼ αὐτοῖς συνθανοῦσα κείσομαι.