# Commentarii in Psalmos (Tom. I: Ps 1–50) 3.1-20-2b

Eusebius, Commentarii in Psalmos (Tom. I: Ps 1–50), 3.1 to 3.2b. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.1-20

ᾨδὴ τῶν ἀναβαθμῶν. πρὸς κύριον ἐν τῷ θλίβεσθαί με ἐκέκραξα, καὶ εἰσήκουσέ μου. Οἱ καταπεσόντες ἀπὸ τῶν τοῦ θεοῦ καλῶν ἀναβαίνουσιν ἐπὶ ταῦτα παρασκευάσαντες εἰς τὴν ἀνάβασιν ἑαυτούς. τὴν οὖν παρασκευὴν ἱκανῶς ἐπιδείξας ὁ ψαλμῳδὸς διὰ τοῦ πρὸ τούτου ψαλμοῦ εἰσάγει τὴν ἀνάβασιν τὴν διὰ τῶν θλίψεων. Κύριε, ῥῦσαι τὴν ψυχήν μου ἀπὸ χειλέων ἀδίκων καὶ ἀπὸ γλώσσης δολίας. Τουτέστιν ἀπὸ πάσης ψευδοδοξίας καὶ ἀπάτης· δεῖται γὰρ ὁ ἐν ἀρχῇ προκοπῆς τυγχάνων, ὅπως μηδεὶς αὐτὸν παραλογίζηται ἐν πιθανολογίᾳ. Ὅθεν καὶ ἐν ἀρχῇ προκοπῆς τυγχάνων δέησιν ἀναπέμπει πρὸς θεὸν ῥυσθῆναι οὐ τὸ σῶμα αὐτοῦ, ἀλλὰ τὴν ψυχὴν ἀπὸ χειλέων ἀδίκων, τουτέστιν ἀπὸ πάσης ψευδοδοξίας καὶ ἀπάτης, ὅπως μηδεὶς αὐτὸν παραλογίζηται ἐν πιθανολογίᾳ μηδὲ συλαγωγῇ. ἀσκητέον δὲ καὶ ἄλλως καθαίρειν ἕκαστον ἡμῶν ἑαυτοῦ τὰ χείλη πρὸς τὸ μὴ ὑπηρετεῖσθαι λόγοις ἀδίκοις ἢ καὶ νοήμασι δεδολιωμένοις.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.