# Commentarii in Psalmos (Tom. I: Ps 1–50) 3.1-38

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρλθʹ Φωναὶ τοῦ κατὰ θεὸν ἀγωνιζομένου. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.1-38

Οἵτινες ἐλογίσαντο ἀδικίας ἐν καρδίᾳ. Ἐμελέτησαν ἄδικα ἐν μὲν τοῖς λογισμοῖς κρύπτοντες τὴν ἑαυτῶν κακίαν, τὴν δὲ γλῶτταν εἰς ἀπάτην παρεσκευασμένοι ὁμοίως τῷ ὄφει τῷ ἀπατήσαντί ποτε τὴν ἐν παραδείσω γυναῖκα. ἐπεῖ κἀκεῖνος προσῄει μὲν τῇ γυναικὶ φιλίαν ὑποκρινόμενος φροντίζειν τε αὐτῆς καὶ κήδεσθαι προσποιούμενος, ἔκρυπτε δὲ ἐν τοῖς ἑαυτοῦ λόγοις τὸν θανατηφόρον ἰὸν τῆς παραβάσεως. τοιοῦτοι δ’ ἂν εἶεν οἱ ἄθεοι αἱρεσιῶται καὶ οἱ διὰ τῆς σοφίας τοὺ κόσμου τούτου ὁπλιζόμενοι εἰς πόλεμον καὶ τὴν γλῶσσαν ἀκονῶντες αὐτῶν μετὰ τοῦ κρύπτειν ὑπὸ τὰ χείλη τὸν ἰὸν τῶν ἀσπίδων δυνάμεων τινῶν δηλαδὴ πονηρῶν. εὔχεται τοίνυν ὁ προφήτης ὑπ’ αὐτοῦ τοῦ θεοῦ φυλαχθῆναι πρὸς τὸ μὴ τοιούτοις περιπεσεῖν.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.