# Commentarii in Psalmos (Tom. I: Ps 1–50) 3.1-7

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρζʹ Κλῆσις ἐθνῶν. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.1-7

Ἑτοίμη ἡ καρδία μου, ὁ θεός, ἑτοίμη ἡ καρδία μου. ᾄσομαι καὶ ψαλῶ ἐν τῇ δόξῃ μου. Ὁ τοῦ σωτηρίου μακαρισμοῦ γενόμενος ἄξιος, δι’ οὓς εἴρηται· μακάριοι οἱ καθαροὶ τῇ καρδίᾳ, ὅτι αὐτοὶ τὸν θεὸν ὄψονται, εἴποι ἂν θαρρῶν τῇ ἑαυτοῦ καθαρότητι· ἑτοίμη ἡ καρδία μου, ὁ θεός . ὁ προφήτης οὖν τὰ φίλα καὶ συγγενῆ τῷ ἁγίῳ πνεύματι δι’ ἐναρέτων ἔργων ἐπιτελέσας τῷ τούτων δοτῆρι θεῷ τὴν προκειμένην εὐχὴν ἀναπέμπει τοιαῦτα δή τινα δι’ αὐτῆς λέγων· ἰδού σοι, δέσποτα βασιλεῦ, τὰ παρὰ τῆς ἐμῆς δυνάμεως παρεσκεύασται. πέμπε σου τὸ πανάγιον πνεῦμα καὶ τὴν προφητικὴν δωροῦ χάριν· ἤδη γὰρ καὶ τὰ τῆς γλώττης ἐξυπηρετεῖσθαι τῷ πνεύματί σου τῷ ἁγίῳ προθυμεῖται. αὐτίκα γοῦν, εἰ παραγένοιτο καὶ πληρώσειέ μου τὴν καρδίαν, ᾄσομαι καὶ ψαλῶ ἀπολαβὼν τὴν ἐμαυτοῦ δόξαν, τουτέστι τὴν προφητικὴν χάριν.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.