# Commentarii in Psalmos (Tom. I: Ps 1–50) 3.10-10

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρλδʹ Διδασκαλία εἰσακτική. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.10-10

Ὁ ἐξάγων ἀνέμους ἐκ θησαυρῶν αὐτοῦ. Μεγαλουργὸς ὢν ὁ κύριος καὶ ἀνέμους προφέρει ἐκ θησαυρῶν αὐτοῦ ὥσπερ ἐξ ἀποκρύφων καὶ ἀπορρήτων ταμιείων τὴν τούτων προφορὰν ποιούμενος. καὶ θέα τίνα τρόπον ἐπὶ μὲν τῶν νεφελῶν οὐκ εἴρηται ὁ ἀνάγων νεφέλας ἐκ θησαυρῶν αὐτοῦ, ἀλλ’ ἐξ ἐσχάτου τῆς γῆς ὡς δήλης οὔσης τῆς τῶν νεφελῶν συστάσεως, ἐπεὶ καὶ ἀλλαχοῦ λέλεκται· ὁ προσκαλούμενος τὸ ὕδωρ τῆς θαλάσσης καὶ ἐκχέων αὐτὸ ἐπὶ πρόσωπον πάσης τῆς γῆς. τὸ δὲ ἀκατάληπτον τῆς τῶν ἀνέμων ὑποστάσεως θησαυρὸν προσεῖπε τοῦ κυρίου διὰ τὸ ἀκατάληπτον τοῦ πράγματος. διόπερ οὐδὲ φιλοσόφων παῖδες οἷοί τε γεγόνασι λόγον ἀποδοῦναι περὶ τοῦ πόθεν φέρεται καὶ πῶς ὑφέστηκεν ἡ τῶν ἀνέμων οὐσία.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.