# Commentarii in Psalmos (Tom. I: Ps 1–50) 3.10-14

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρμϛʹ Ὕμνος σὺν θεολογίᾳ. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.10-14

Τῷ περιβάλλοντι τὸν οὐρανὸν ἐν νεφέλαις, τῷ ἑτοιμάζοντι τῇ γῇ ὑετόν, τῷ ἐξανατέλλοντι ἐν ὄρεσι χόρτον, διδόντι τοῖς κτήνεσι τροφὴν αὐτῶν καὶ τοῖς νεοσσοῖς τῶν κοράκων τοῖς ἐπικαλουμένοις αὐτόν. Τίς ποτε οὗτος καὶ ποταπὸς καὶ πηλίκος τὸ μέγεθος; οὐχ ὁρᾶς τὸν μέγαν καὶ τοσοῦτον οὐρανὸν ἀθρόως ἀφανῆ γινόμενον, ὁπηνίκα ὑπὸ νεφελῶν καλύπτεται καὶ τοσοῦτον κύτος καὶ μέγεθος ὑπὸ μικρῶν συστημάτων ὑφ’ ἓν συναπτομένων; οὐχ ὁρᾶς τὴν ὑγρὰν οὐσίαν κατὰ μὲν τὴν τοῦ θέρους ὥραν ἡσυχάζουσαν, ἐν τεταγμένῳ δὲ χειμῶνος καιρῷ φερομένην καὶ τῇ γῇ χορηγουμένην; ταῦτα γὰρ αἰνιττόμενός φησιν· τῷ περιβαλλόντι τὸν οὐρανὸν ἐν νεφέλαις, τῷ ἑτοιμάζοντι τῇ γῇ ὑετόν.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.