# Commentarii in Psalmos (Tom. I: Ps 1–50) 3.10-6

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ριζʹ Νίκη τῶν ἐν Χριστῷ ἀγωνιζομένων καὶ προφητεία περὶ Χριστοῦ. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.10-6

Αὕτη ἡ ἡμέρα, ἣν ἐποίησεν ὁ κύριος. ἀγαλλιασώμεθα καὶ εὐφρανθῶμεν ἐν αὐτῇ. Ποία δὲ αὕτη ἡ ἡμέρα ἀλλ’ ἢ ἡ σωτήριος τῶν ἐθνῶν ἁπάντων, καθ’ ἣν ὁ ἀποβληθεὶς λίθος γέγονεν εἰς κεφαλὴν γωνίας ; σημαίνει δὲ ὁ λόγος τὴν ἀναστάσιμον τοῦ σωτῆρος ἡμῶν τὴν καὶ ἐπώνυμον αὐτοῦ γενομένην δηλαδὴ τὴν κυριακήν· τὰς μὲν γὰρ λοιπὰς ἡμέρας ὁ ἥλιος φωτίζων ἀποτελεῖ καὶ τὸ ἐξ αὐτοῦ φῶς σώμασιν, ἀλλ’ οὐ ψυχαῖς παρέχει, τὸ δὲ τοῦ σωτηρίου λόγου φέγγος ψυχῶν λογικῶν καταυγαστικὸν τυγχάνει. ὃ δὴ καὶ ἡμέραν καινὴν καὶ νέαν φωτὸς εὐσεβείας τῷ παντὶ κόσμῳ συνεστήσατο, ὡς καθ’ ὅλης τῆς ἀνθρώπων οἰκουμένης πάντα τὰ ἔθνη ἑορτὴν ἄγειν τὴν δηλωθεῖσαν κυριακὴν ἡμέραν. Νοήσεις δὲ πῶς λέλεκται αὕτη ἡ ἡμέρα, ἣν ἐποίησεν ὁ κύριος ἐπιστήσας, ὅπως ἐν τῇ Κοσμοποιίᾳ ἐν τῇ πρώτῃ ἡμέρᾳ οὐδὲν ἕτερον ἀναγέγραπται πεποιηκὼς ἀλλ’ αὐτὴν μόνην τὴν ἡμέραν· εἶπε γὰρ ὁ θεὸς· γενηθήτω φῶς, καὶ ἐγένετο φῶς. καὶ ἐκάλεσεν ὁ θεὸς τὸ φῶς ἡμέραν .

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.