# Commentarii in Psalmos (Tom. I: Ps 1–50) 3.10b

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρϛʹ Προφητεία κλήσεως ἐθνῶν καὶ τῆς εἰς ἀνθρώπους τοῦ θεοῦ λόγου ἐπιλάμψεως. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.10b

Ὡς μηκέτι κατὰ τὸ παλαιὸν πλανᾶσθαι μηδὲ τὰς ψυχὰς λιμώττειν δι’ ἔνδειαν λογικῶν τροφῶν μηδὲ εἰλῆσθαι περὶ τοῦ θανάτου τὰς πύλας , ἀλλ’ εἰδέναι καὶ ὁδεύειν τὴν ὁδὸν τὴν φέρουσαν ἐπὶ τὴν οὐράνιον πύλην. εἶτα ἐπειδὴ τοῖς ὁδοιποροῦσι καὶ ἰσχύος χρεία, εἰκότως ταῖς ἑαυτοῦ λογικαῖς τροφαῖς τὴν πάλαι διάκενον ψυχὴν ἐχόρτασε καὶ ἀντὶ σκότους καὶ ἀγνοίας θεοῦ εἰς τὸ τῆς γνώσεως φῶς μετεστήσατο καὶ ὑπὸ σκιὰν ζωῆς ἤγαγε – τὴν γὰρ ἐνταῦθα ζωὴν τῶν ἁγίων οὐκ ἂν ἁμάρτοις εἰπὼν σκιὰν τῆς αἰωνίου ζωῆς – καὶ πρὸς ἑαυτὸν ἑλκύσας ἀγάπης δεσμοῖς κατεδήσατο καὶ ἐν παντὶ λόγῳ καὶ πάσῃ γνώσει κατεπλούτησεν, ὥστε ἡμᾶς ὑστερεῖσθαι ἐν μηδενὶ χαρίσματι .

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.