# Commentarii in Psalmos (Tom. I: Ps 1–50) 3.11-9

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, Ὑποθέσεις. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.11-9

ια Ἡ ἑνδεκάτη τῶν ἀναβαθμῶν ᾠδὴ εὐχὴν περιέχει μαρτύρων. οὐ μὴν ἀλλὰ καὶ διδάσκει πάντα τὸν ἐξ ἐθνῶν ἐπιστρέφοντα τρόπον μετανοίας καὶ ἐξομολογήσεως παιδεύουσα λέγειν· ἐκ βαθέων ἐκέκραξά σε, κύριε , καὶ τὰ ἑξῆς, ἐν οἷς ἐστιν· ἐὰν ἀνομίας παρατηρήσῃ, κύριε, κύριε, τίς ὑποστήσεται; ὅτι παρὰ σοῦ ὁ ἱλασμός ἐστιν . ἤδη δὲ ἐν τούτοις σαφῶς τοῦ θεοῦ μέμνηται καὶ τοῦ ἱλασμοῦ αὐτοῦ. τοῦτον δὲ εἶναι τὸν Χριστὸν ἐδίδαξεν ὁ θεῖος ἀπόστολος εἰπών· ὃν προέθετο ὁ θεὸς ἱλαστήριον διὰ πίστεως ἐν τῷ αὐτοῦ αἵματι . καὶ ὁ Ἱωάννης ἐν τῇ ἐπιστολῇ φησιν· καὶ ἐάν τις ἁμάρτῃ, παράκλητον ἔχομεν πρὸς τὸν πατέρα, Ἰησοῦν Χριστὸν δίκαιον. καὶ αὐτός ἐστιν ἱλασμὸς ὑπὲρ τῶν ἁμαρτιῶν ἡμῶν, οὐχ ὑπὲρ τῶν ἡμετέρων δὲ μόνον, ἀλλὰ καὶ ὑπὲρ ὅλου τοῦ κόσμου . τούτου δὲ τοῦ ἱλασμοῦ καὶ Μωυσῆς τὰ σύμβολα καὶ τὰς εἰκόνας ἐποίει ἐπὶ τῆς κιβωτοῦ, ἅπερ ἐπὶ σχολῆς θεωρήσεις. καὶ ἑξῆς δὲ πάλιν ἡ ᾠδὴ μέμνηται τοῦ λόγου τοῦ θεοῦ τοῦ ἐν ἀρχῇ πρὸς τὸν θεόν , ἐν οἷς φησιν· ὑπέμεινεν ἡ ψυχή μου εἰς τὸν λόγον σου .

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.