# Commentarii in Psalmos (Tom. I: Ps 1–50) 3.1b-2

Eusebius, Commentarii in Psalmos (Tom. I: Ps 1–50), 3.1b to 3.2. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.1b

Ὁ μὲν πρὸ τῶν πειρασμῶν νεκρὸς ὢν δι’ ἁμαρτίας εἰς βυθὸν κακῶν χωρήσας κατὰ τοὺς τῶν διωγμῶν καιροὺς νεκρὸς ὢν κατεπόθη, ὁ δὲ πρὸ τούτου ζῶν κατὰ θεόν, ἔπειτα ἐν καιροῖς διωγμῶν ἐξομοσάμενος καὶ εἰς παντελῆ χωρήσας ἀποστασίαν ζῶν κατεπόθη. τοῦτο δὲ οὐδέποτε πείσεται ὁ ἀληθινὸς Ἰσραὴλ ἔχων ἐν ἑαυτῷ τὸν κύριον διὰ τὴν τῆς ψυχῆς καθαρότητα. Ἐν τῷ ὀργισθῆναι τὸν θυμὸν αὐτῶν ἐφ’ ἡμᾶς. ἄρα τὸ ὕδωρ κατεπόντισεν ἡμᾶς, χείμαρρον διῆλθεν ἡ ψυχὴ ἡμῶν. ἄρα διῆλθεν ἡ ψυχὴ ἡμῶν τὸ ὕδωρ τὸ ἀνυπόστατον. Τὸν περιστατικὸν καιρὸν ᾗ τάχος παριόντα δίκην πλημμυροῦντος χειμάρρου καὶ σφοδρότατα ἐνρήττοντος οὐ μὴν καὶ ἐπὶ πολὺν χρόνον διαρκοῦντος, ἀλλ’ ἀθρόως μὲν πληρουμένου, πάλιν δὲ ἀθρόως ἐκλείποντος καὶ ξηραινομένου.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.