# Commentarii in Psalmos (Tom. I: Ps 1–50) 3.2-16

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, Ὑποθέσεις. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.2-16

β Τὴν δευτέραν ᾠδὴν τῶν ἀναβαθμῶν εἰκότως προσφέρεται ὁ διὰ τῆς πρώτης ἐπακουσθείς. παρίστησι γοῦν τῆς μὲν παροικίας ἑαυτὸν ἀπηλλάχθαι ἐν δὲ τῇ ἐπανόδῳ τῇ εἰς τὰ οἰκεῖα τυγχάνων καὶ καθ’ ὁδὸν ὑπάρχων ἔτι ἀνὰ μέσον τῶν ὀρέων καὶ τῆς μακρᾶς πορείας τῆς μεταξὺ Βαβυλῶνος καὶ τῆς Ἱερουσαλήμ. διό φησιν· ἦρα τοὺς ὀφθαλμούς μου εἰς τὰ ὄρη ὅθεν ἥξει ἡ βοήθειά μου . ἐπιζητήσας δὲ καὶ πυθόμενος· πόθεν ἥξει; εὗρε τὸν βοηθόν. διό φησιν· ἡ βοήθειά μου παρὰ κυρίου τοῦ ποιήσαντος τὸν οὐρανὸν καὶ τὴν γῆν . εἶθ’ ὡς λοιπὸν ἔχοντι τὸν βοηθὸν ἀποκρίνεται ὁ λόγος· μὴ δῷς εἰς σάλον τὸν πόδα σου, μηδὲ νυστάξῃ ὁ φυλάσσων σε. καὶ πάλιν· ἡμέρας ὁ ἥλιος οὐ συγκαύσει σε, οὐδὲ ἡ σελήνη τὴν νύκτα . καὶ πάλιν· κύριος φυλάξει τὴν εἴσοδόν σου καὶ τὴν ἔξοδόν σου . σαφῶς γὰρ ταῦτα παρίστησιν ὁδοιπορίας σύμβολα καὶ ἔξοδον μὲν τὴν ἀπὸ τῆς πολεμίας γῆς, πορείαν δὲ τὴν ἐπάνοδον καὶ ἐπὶ τούτοις τὴν εἴσοδον τὴν ἐπὶ τὰ οἰκεῖα.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.