# Commentarii in Psalmos (Tom. I: Ps 1–50) 3.2-25

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρκθʹ Εὐχῆς μαρτύρων. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.2-25

Ἐὰν ἀνομίας παρατηρήσῃ, κύριε, κύριε, τίς ὑποστήσεται; ὅτι παρὰ σοὶ ὁ ἱλασμός ἐστιν. Ὁ εἰπὼν ἀνωτέρω· πλεονάκις ἐπολέμησάν με ἐκ νεότητός μου, καὶ γὰρ οὐκ ἠδυνήθησάν μοι , καὶ τὰ ἑξῆς, δοκεῖ μοι διὰ τῆς παρούσης ᾠδῆς ὑπὲρ τῶν ἐν αὐτῷ ἀσθενῶν τὴν εὐχὴν ἀναπέμπειν. ἐπεὶ γὰρ μὴ πάντες οἱ ἐν τῇ ἐκκλησίᾳ Χριστοῦ δύνανται λέγειν καὶ γὰρ οὐκ ἠδυνήθησάν μοι περὶ τῶν πολεμιῶν, ἀναγκαίως περὶ τῶν ἐξασθενούντων κατὰ τοὺς καιροὺς τῶν διωγμῶν τὰ προκείμενα λέγεται. διό φησιν· ἐὰν ἀνομίας παρατηρήσῃ, κύριε, κύριε, τίς ὑποστήσεται; εἰ μὴ ἄρα καὶ αὐτὸς περὶ τῶν προτέρων αὐτοῦ ἀνομιῶν τῶν πρὸ τῆς κλήσεως ταῦτα ἐξομολογεῖται.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.