# Commentarii in Psalmos (Tom. I: Ps 1–50) 3.2-44

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρμηʹ Ὕμνος σὺν θεολογίᾳ. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.2-44

Αἰνεῖτε αὐτόν, πάντες οἱ ἄγγελοι αὐτοῦ, αἰνεῖτε αὐτόν, πᾶσαι αἱ δυνάμεις αὐτοῦ. Πρὸς μὲν τὸ αἰνεῖτε τὸν κύριον ἐν τοῖς οὐρανοῖς συναπτέον τὸ αἰνεῖτε αὐτόν, ἥλιος καὶ σελήνη. αἰνεῖτε αὐτόν, πάντα τὰ ἄστρα καὶ τὸ φῶς . πρὸς δὲ τὸ αἰνεῖτε αὐτὸν ἐν τοῖς ὑψίστοις καταλλήλως ἀποδοτέον τὸ αἰνεῖτε αὐτόν, πάντες οἱ ἄγγελοι αὐτοῦ καὶ πᾶσαι αἱ δυνάμεις αὐτοῦ· ἥλιος μὲν γὰρ καὶ σελήνη αἰσθητὰ σώματα ὄντες καὶ ἐν τοῖς φαινομένοις ὁρώμενοι εἰκότως ἀπὸ τῶν αἰσθητῶν οὐρανῶν αἰνεῖν τὸν ἑαυτῶν ποιητήν τε καὶ δημιουργὸν θεὸν προστάττονται. ἄγγελοι δὲ καὶ δυνάμεις αὐτοῦ ἅτε ἀφανεῖς ὄντες καὶ ἡμῖν ἀόρατοι ἀπὸ τῶν ἀφανῶν ἡμῖν ὑψίστων τῷ θεῷ τὸν αἶνον ἀποδιδόναι κελεύονται.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.