# Commentarii in Psalmos (Tom. I: Ps 1–50) 3.3-12

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ριζʹ Νίκη τῶν ἐν Χριστῷ ἀγωνιζομένων καὶ προφητεία περὶ Χριστοῦ. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.3-12

Εἰπάτωσαν δὴ πάντες οἱ φοβούμενοι τὸν κύριον, ὅτι ἀγαθός, ὅτι εἰς τὸν αἰῶνα τὸ ἔλεος αὐτοῦ. Φοβουμένους τὸν κύριον τοὺς ἐξ ἐθνῶν καλεῖ κεκλημένους. εἰ δὲ βούλει, Ἰσραὴλ μὲν νόει τοὺς ἐξ ἐθνῶν ἀναγεννωμένους καὶ υἱοὺς Χριστοῦ τοὺς ἐκ σπέρματος Ἰσραὴλ χρηματίζοντας, μάλιστα εἰ καὶ τὴν δύναμιν τοῦ ὀνόματος σῴζοιεν, οἳ καὶ προκόψαντες λεχθεῖεν ἂν οἶκος Ἀαρών . οἱ δὲ πρὸ τῆς ἀναγεννήσεως ἐν προθύροις ὥσπερ ἑστῶτες τῆς κλήσεως καὶ ἐν κατηχουμένοις ὄντες, εὐλόγως ἂν λεχθεῖεν οἱ φοβούμενοι τὸν κύριον ἔτι πνεύματι δουλείας παιδαγωγούμενοι καὶ ὑπὸ φόβου ὄντες ἅτε μήπω τὸ πνεῦμα τῆς υἱοθεσίας ἀπειληφότες διὰ τὸ μὴ ἀναγεγεννῆσθαι ἐν Χριστῷ.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.