# Commentarii in Psalmos (Tom. I: Ps 1–50) 3.3-15

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ριθʹ Παροικίας. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.3-15

Τί δοθείη σοι καὶ τί προστεθείη σοι πρὸς γλῶσσαν δολίαν; τὰ βέλη τοῦ δυνατοῦ ἠκονημένα σὺν τοῖς ἄνθραξι τοῖς ἐρημικοῖς. Ἐπακούσας ὁ λόγος τοῦ προσευξαμένου κατὰ τό· ἔτι λαλοῦντός σου ἐρῶ· ἰδοὺ πάρειμι , ἀποκρίνεται αὐτῷ καί φησιν· θάρσει, ὦ οὗτος, εἰδώς, ὅτι προστάτην καὶ ὑπέρμαχον ἔχεις δυνατὸν ὅπλοις χρώμενον ὑπὲρ σοῦ κατὰ τῶν σῶν πολεμίων· βέλη τε γὰρ ἠκόνησε κατ’ αὐτῶν καὶ ἄνθρακας ἡτοίμασεν ἐρημοποιούς, οἷς αὐτοὺς μετελεύσεται ἐν ταῖς κατ’ αὐτῶν τιμωρίαις. τί οὖν πλέον αἰτεῖς δοθῆναί σοι ἢ τί θέλεις προστεθῆναί σοι μετὰ τὴν τοσαύτην τοῦ δυνατοῦ κατὰ τῶν ἀσεβῶν παρασκευήν;

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.