# Commentarii in Psalmos (Tom. I: Ps 1–50) 3.3-19

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρκεʹ Προσδοκία μελλόντων. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.3-19

Οἱ σπείροντες ἐν δάκρυσιν ἐν ἀγαλλιάσει θεριοῦσιν. πορευόμενοι ἐπορεύοντο καὶ ἔκλαιον αἴροντες τὰ σπέρματα αὐτῶν. ἐρχόμενοι δὲ ἥξουσιν ἐν ἀγαλλιάσει αἴροντες τὰ δράγματα αὐτῶν. Τοῖς εὐξαμένοις περὶ τῶν καταλοίπων ἀποκρίνεται τὸ θεῖον πνεῦμα φάσκον· ἀκούσατε, ὦ οὗτοι, μακάριοι οἱ κλαίοντες, ὅτι αὐτοὶ γελάσονται , καί· μακάριοι οἱ πενθοῦντες, ὅτι αὐτοὶ παρακληθήσονται .ἐὰν οὖν οἱ ἐν τῇ αἰχμαλωσίᾳ τυγχάνοντες τὴν κατὰ θεὸν λύπην λυπούμενοι ἀποκλαίοιντο τὰ ἑαυτῶν κακὰ μονονουχὶ τοῖς ἑαυτῶν δάκρυσιν ἀγαθὰς ἐλπίδας ἑαυτοῖς παρὰ τῷ θεῷ σπείροντες, εὖ ἴστε, ἐν ἀγαλλιάσει θεριοῦσιν, ὥστε εἰ καὶ πορευόμενοι ἔκλαιον, ἀλλ’ ἐπανιόντες ἀγαλλιάσονται· καὶ εἰ βραχέα σπέρματα εὐσεβείας τὰ ἀπὸ τῆς Ἱερουσαλὴμ ἀπῆλθον ἐν ἑαυτοῖς ἔχοντες, ἀλλ’ ἐκεῖ γεωργήσαντες τὰς ἑαυτῶν ψυχὰς καὶ ὧν ἔχουσι σπερμάτων ἐπιμεληθέντες καὶ πολὺν τὸν ἐν θεῷ καρπὸν συλλεξάμενοι οὐκέτι σπέρματα, ἀλλὰ δράγματα καὶ τελείους στάχυας φέροντες μεθ’ ἑαυτῶν ἐπανήξουσι. Καὶ τοῦτο τέλος τῆς ἑβδόμης ᾠδῆς περὶ τῆς ἐπανόδου τοῦ παντὸς Ἰσραὴλ καὶ τῆς ἐπὶ ταὐτὸν συναγωγῆς αὐτῶν προφητευούσης· ἔνθα συνάγειν μοι δοκεῖ τὰ περὶ τοῦ ἐκ περιτομῆς λαοῦ θεσπισθέντα.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.