# Commentarii in Psalmos (Tom. I: Ps 1–50) 3.3-27

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρλδʹ Διδασκαλία εἰσακτική. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.3-27

Ψάλατε τῷ ὀνόματι αὐτοῦ, ὅτι καλόν. Τὸ ψάλλειν δι’ ὀργάνου γίνεται μουσικοῦ τοῦ καλουμένου ψαλτηρίου συμφώνως ἡρμοσμένου. τοιοῦτον δ’ ἐστὶ τὸ κοινὸν ἄθροισμα τῆς ἐκκλησίας, ἐν ὧ ἐκ διαφόρων δούλων θεοῦ ψυχῶν τε καὶ παντοίων τρόπων εἷς ὕμνος διὰ φωνῆς μιᾶς ἀναπέμπεται τῷ κυρίῳ. ἀλλὰ καὶ τὸ ἀνθρώπειον σῶμα ἐκ διαφόρων ἡρμοσμένων αἰσθήσεων ψαλτήριον ἂν εἴη καθ’ ἕτερον τρόπον, δι’ οὗ τὰ τῆς ἐναρέτου πολιτείας ὁ ἐν ἀνθρώπῳ νοῦς ἐμμελῶς καὶ εὐρύθμως ἀνακρουόμενος ἀνορθοῖ. Τὸ δὲ ὅτι καλὸν δύναται μὲν συνάπτεσθαι τῷ ὀνόματι τοῦ κυρίου, δύναται δὲ καὶ τῷ ψάλλειν. οἵ γε μὴν ἐνταῦθα παιδευόμενοι δοκοῦσί μοι ἐξ ἐθνῶν προσιόντες εἶναι τῷ λόγῳ, οἵτινες τὰ περὶ τοῦ Ἰσραὴλ καὶ τοῦ Ἰακὼβ παιδεύονται ὡς ἂν ἀλλότριοι αὐτῶν ὄντες καὶ ἐξ ἑτέρου γένους ὁρμώμενοι.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.