# Commentarii in Psalmos (Tom. I: Ps 1–50) 3.3-35

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρμγʹ Εὐχαριστία νενικηκότος. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.3-35

Κύριε, τί ἐστιν ἄνθρωπος, ὅτι ἐγνώσθης αὐτῷ, ἢ υἱὸς ἀνθρώπου, ὅτι λογίζῃ αὐτόν; Τὰ ὅμοια καὶ ἐν τῷ ὀγδόῳ ψαλμῷ λέγεται περὶ τῆς τῶν ἐθνῶν κλήσεως τῆς διὰ τοῦ σωτῆρος ἡμῶν γενομένης, ὡς ἐξ αὐτῶν παρίσταται τῶν ῥητῶν. πυνθάνεται δὲ ὁ λόγος ἐρωτηματικῶς τὸ τί ἐστιν ἄνθρωπος; ἡμᾶς διδάξαι βουλόμενος, ὅτι μέγα ἄνθρωπος· οὐ γὰρ ἂν ἐχώρησε θεοῦ γνῶσιν, οὐδ’ ἂν ἐμνήσθη αὐτοῦ ὁ θεὸς οὕτως, ὡς καὶ σωτῆρα καὶ λυτρωτὴν ἐξαποστεῖλαι αὐτῷ τὸν ἑαυτοῦ λόγον. παραινεῖ δὲ ἐν τῷ αὐτῷ μηδ’ ἑνὸς ἀνθρώπων καταφρονεῖν. Ἡ δὲ τῆς ἀκολουθίας διάνοια θαυμαστὸν περιέχει τῆς τοῦ θεοῦ προνοίας τῆς περὶ τὸν ἄνθρωπον· · τί γὰρ τοιοῦτον κατορθοῖ ἄνθρωπος, ὡς αὐτόν σε, τὸν θεόν, διδάσκαλον ἐπιγράψασθαι, καὶ σοὶ μέλει, τῷ θεῷ, τὸν ἑαυτοῦ λαὸν ὑποτάσσειν αὐτῷ; ταῦτα δέ φησι διδάσκων, ὡς οὐκ ἂν ἐγνώσθη ποτὲ ἀνθρώπῳ ὁ θεὸς οὐδ’ ἂν ἐλογίσατο αὐτὸν εἶναί τι οὐδ’ ἂν ἐξ οὐρανοῦ τὸν λόγον αὐτοῦ δι’ αὐτὸν ἀπεστάλκει, εἰ μὴ μέγα τι ἦν καὶ ἄξιόν τι ἦν τῶν τοῦ θεοῦ λογισμῶν.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.