# Commentarii in Psalmos (Tom. I: Ps 1–50) 3.4-20

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρλαʹ Προσευχὴ τοῦ Δαυὶδ καὶ ἐπιφάνεια Χριστοῦ. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.4-20

Εἰσελευσόμεθα εἰς τὰ σκηνώματα αὐτοῦ, προσκυνήσομεν εἰς τὸν τόπον, οὗ ἔστησαν οἱ πόδες αὐτοῦ. Ὅτι προσῆλθον ἄγγελοι καὶ διηκόνουν αὐτῷ , σαφῶς διδάσκει τὸ εὐαγγέλιον. οὗτοι δὴ οὖν οἱ ἄγγελοι δίκην ὑπηρετῶν εἵποντο αὐτῷ ἐν πᾶσι τοῖς σκηνώμασιν, οἷς κατεγίνετο, διακονούμενοι αὐτῷ οὐ τότε μόνον, καθ’ ὃν χρόνον τὰς ἐν ἀνθρώποις ἐποιεῖτο διατριβάς, ἀλλὰ καὶ εἰσέτι δεῦρο ἐν πάσαις ταῖς ἐκκλησίαις αὐτοῦ. ἀλλ’ ὁ μὲν Δαυὶδ ἓν σκήνωμα εὑρεῖν ᾐτήσατο, οἱ δὲ ἀνθ’ ἑνὸς πολλὰ διδάσκουσιν ὑπάρχειν αὐτῷ σκηνώματα. Ὅπως δὲ προσκυνοῦσιν εἰς τὸν τόπον, οὗ ἔστησαν οἱ πόδες αὐτοῦ, πάντες οἱ εἰς αὐτὸν πεπιστευκότες, οὐδὲν δεῖ λέγειν ἐπὶ τοῦ ἐλαιῶν ὄρους δεικνυμένου εἰσέτι δεῦρο τοῦ τόπου, οὗ ἔστησαν. ἔνθα ἀπὸ τῶν περάτων τῆς γῆς ἀφικνούμενοι προσκυνοῦσιν αὐτὸν οἱ ταύτης τῆς χάριτος καταξιούμενοι. Ἀντὶ δὲ τοῦ προσκυνήσωμεν εἰς τὸν τόπον, οὗ ἔστησαν οἱ πόδες αὐτοῦ οἱ λοιποὶ πάντες ἑρμηνευταὶ συμφώνως προσκυνήσωμεν τῷ ὑποποδίῳ τῶν ποδῶν αὐτοῦ εἰρήκασιν.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.