# Commentarii in Psalmos (Tom. I: Ps 1–50) 3.4-35

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρμθʹ Ὕμνος σὺν θεολογίᾳ. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.4-35

Αἱ ὑψώσεις τοῦ θεοῦ ἐν τῷ λάρυγγι αὐτῶν καὶ ῥομφαῖαι δίστομοι ἐν ταῖς χερσὶν αὐτῶν τοῦ ποιῆσαι ἐκδίκησιν ἐν τοῖς ἔθνεσιν, ἐλεγμοὺς ἐν τοῖς λαοῖς. Παραδόξως δὲ ὁ Ἀκύλας ἐν τούτοις τὴν ἀποδοθεῖσαν διάνοιαν παρέστησε δουλεύσας τῇ Ἑβραίων φωνῇ εἰπών· καὶ μάχαιρα στομάτων ἐν χειρὶ αὐτῶν. καὶ περὶ τῶν ἐναντίων δὲ τούτοις τὸν διὰ τοῦ ἰδίου στόματος θάνατον καὶ ἀπώλειαν ἐργαζομένων τοῖς ὑπ’ αὐτῶν ἁλισκομένοις εἴρηταί που· υἱοὶ ἀνθρώπων, οἱ ὀδόντες αὐτῶν ὅπλα καὶ βέλη, καὶ ἡ γλῶσσα αὐτῶν μάχαιρα ὀξεῖα. σφόδρα δὲ θαυμαστῶς ἐν τούτοις τὴν μὲν μάχαιραν τῶν στομάτων ἐν ταῖς πράξεσιν ἐνεργεῖν ὁ λόγος παρέστησε, τὰς δὲ ὑψώσεις τοῦ θεοῦ ἐν τῷ στόματι αὐτῶν διδάσκων, ὅτι τῷ μὲν στόματι καὶ τῇ φωνῇ τῇ ἑαυτῶν ἐχρῶντο ἐπὶ διδασκαλίᾳ τοῦ λόγου, δι’ ἧς τὸν ὕμνον ἀνύψουν παρὰ τοῖς ἀκούειν αὐτῶν δυναμένοις, ταῖς δὲ χερσίν, τουτέστι ταῖς πράξεσι, τοιαῦτα ἐνήργουν, ὡς τὰς πράξεις αὐτῶν ἰσχὺν ἔχειν καθαιρετικὴν πάσης ἀντικειμένης δυνάμεως.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.