# Commentarii in Psalmos (Tom. I: Ps 1–50) 3.5-23

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρμαʹ Φωνὴ τοῦ κατὰ θεὸν πολεμουμένου. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.5-23

Ἐκέκραξα πρὸς σέ, κύριε, εἶπα· σὺ εἶ ἡ ἐλπίς μου, μερίς μου ἐν γῇ ζώντων. Πάλιν καὶ ἐνταῦθα κράζειν ὁμολογεῖ, οὐχ ἁπλῶς, ἀλλὰ πρὸς τὸν κύριον· ἄλλως γὰρ ἀδύνατον ἦν αὐτῷ φωνὴν ἀφιέναι πλησίον παρόντος τοῦ ἐχθροῦ. τὴν μόνην δ’ ἐλπίδα αὐτοῦ τὸν θεὸν ἔχειν ὁμολογήσας οὐκ ἐξέπεσε τοῦ σκοποῦ· ἡ γὰρ ἐλπὶς οὐ καταισχύνει. ἀλλὰ καὶ εἴ τις ἔσται γῇ ζώντων, ὁμολογῶ, φησίν, ἐγὼ μηδεμίαν ἔχειν χώραν ἐν ταύτῃ ἢ σὲ μόνον τὴν ἐμὴν ἐλπίδα· σὺ γὰρ εἶ, ὁ θεὸς, ἡ μερίς μου ἐν γῇ ζώντων, ὡς, εἰ μὴ σὲ εἶχον, οὐκ ἂν ἐξετάσθην ποτὲ ἐν γῇ ζώντων. ζώντων δὲ γῆ οὐχ ἡ πατουμένη νῦν πρὸς ἡμῶν – θανάτου γὰρ γῆ καὶ νεκρῶν αὕτη – ἀλλ’ ἣν κληρονομήσουσιν οἱ πρᾳεῖς , ἐφ’ ᾗ ζῶντες πάντες κατὰ τὴν αἰώνιον ζωὴν διατρίβουσιν.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.