# Commentarii in Psalmos (Tom. I: Ps 1–50) 3.5-30

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρμηʹ Ὕμνος σὺν θεολογίᾳ. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.5-30

Μεταβὰς ἀπὸ τῶν οὐρανίων ἐπὶ τὰ κατὰ τὸν ἀέρα ὑφιστάμενα πρόεισιν ἐπὶ τὰ ἐν τῇ γῇ, ὧν τὰ πρῶτα ὄρη καὶ βουνοὶ ὀνομάζει τὰ ὑπὸ ἕξεως μόνης διακρατούμενα, εἶτα ἐπιδίδωσι ἐπὶ τὰ κρείττονα, ταῦτα δὲ ἦν ξύλα καρποφόρα ἃ δὴ φύσεως μετειληχότα πλεῖόν τι ἔχει τῶν ἐν ἕξει μόνῃ τυγχανόντων ὀρῶν καὶ βουνῶν. κρείττονος γοῦν ταῦτα μετέχει δυνάμεως ἅτε δὴ θρεπτικῆς ἤδη καὶ αὐξητικῆς κινήσεως μετειληχότα καὶ χρῆσιν ἀναγκαίαν τῷ βίῳ παρεχόμενα. ἐπειδὴ δὲ τῶν ἀπὸ γῆς φυομένων τὰ μὲν ὡς πρὸς τροφὴν ἐπιτήδεια τυγχάνει ἀνθρώποις καὶ τοῖς ἄλλοις ζῴοις, τὰ δὲ τροφὴν μὲν τούτοις οὐ παρέχει, ἄλλην δὲ χρῆσιν ὑπηρεσίας, ἀκριβῶς διεῖλε τὴν τούτων διαφορὰν εἰπών· ξύλα καρποφόρα καὶ πᾶσαι κέδροι.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.