# Commentarii in Psalmos (Tom. I: Ps 1–50) 3.6-12

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ριζʹ Νίκη τῶν ἐν Χριστῷ ἀγωνιζομένων καὶ προφητεία περὶ Χριστοῦ. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.6-12

Δεξιὰ κυρίου ἐποίησε δύναμιν, δεξιὰ κυρίου ὕψωσέ με, δεξιὰ κυρίου ἐποίησε δύναμιν. οὐκ ἀποθανοῦμαι, ἀλλὰ ζήσομαι καὶ ἐκδιηγήσομαι τὰ ἔργα κυρίου. Ἀπολωλότων τῶν ἐχθρῶν εἰρήνης τε λοιπὸν διαλαβούσης καὶ τῶν σκηνῶν τοῦ θεοῦ τουτέστι τῶν ἐκκλησιῶν αὐτοῦ καθ’ ὅλης τῆς οἰκουμένης ἐγηγερμένων φωνή, φησίν, ἔνδον ἀκούεται ἐν ταῖς ἐκκλησίαις τῶν σεσῳσμένων ἀγαλλιωμένων . τί δὲ λέγουσα ἡ φωνὴ ἀκούεται ἀλλ’ ἢ τὰ προειρημένα, δι’ ὧν οἱ τυχόντες τῆς σωτηρίας ἔνδον ἐν ταῖς σκηναῖς οἰκοῦντες τὰ αἴτια τῆς τῶν πολεμίων καθαιρέσεως καὶ τῆς μετὰ ταῦτα γενομένης εἰρήνης διδάσκονται, φησίν, οὐκ ἄλλον αἴτιον γεγονέναι ἢ μόνην τὴν δεξιὰν τοῦ κυρίου; αὕτη γὰρ καὶ ἐνεδυνάμωσε τὸν αὐτῆς λαὸν κατὰ τὸν τῶν διωγμῶν καιρόν. αὕτη καὶ τοὺς ἐχθροὺς τοῦ θεοῦ ταπεινώσασα αὐτὸν ὕψωσε τὸν λαόν. αὕτη καὶ δύναμιν περιεποιήσατο τοῖς πρότερον πολεμουμένοις, ὥστε μὴ ὑποπεσεῖν τῷ κατὰ τὴν ψυχὴν θανάτῳ, ἀλλὰ ζῆσαι τῷ θεῷ καὶ παραμεῖναι τῷ βίῳ ἐπὶ τῷ τὰ θαυμαστὰ ἔργα καὶ τὰς παραδόξους δυνάμεις αὐτοῦ τοῖς μὴ ὄψει παρειληφόσιν ἐκδιηγεῖσθαι .

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.