# Commentarii in Psalmos (Tom. I: Ps 1–50) 3.6-17

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρλδʹ Διδασκαλία εἰσακτική. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.6-17

Πάντα, ὅσα ἠθέλησεν ὁ κύριος, ἐποίησεν ἐν τῷ οὐρανῷ καὶ ἐν τῇ γῇ, ἐν ταῖς θαλάσσαις καὶ ἐν πάσαις ταῖς ἀβύσσοις. Τούτοις δὲ ὅμοιόν ἐστι τό· ἐκ μεγέθους καὶ καλλονῆς κτισμάτων ἀναλόγως ὁ γενεσιουργὸς θεωρεῖται , καὶ τὸ παρὰ τῷ ἀποστόλῳ· τὰ γὰρ ἀόρατα αὐτοῦ ἀπὸ κτίσεως κόσμου τοῖς ποιήμασι νοούμενα καθορᾶται . Ἀβύσσους δὲ αὐτὸν οἶμαι λέγειν τὰ καταχθόνια . ἔνθα κατεληλυθέναι τὸν σωτῆρα καὶ κύριον ἡμῶν παρίστησιν ὁ αὐτὸς φάσκων· μὴ εἴπῃς· τίς καταβήσεται εἰς τὴν ἄβυσσον; τουτέστι Χριστὸν ἐκ νεκρῶν ἀναγαγεῖν . καὶ ἐν τῷ Ἰὼβ δὲ εἴρηται· ἐν δὲ ἴχνεσιν ἀβύσσου περιεπάτησας; ἀνοίγονται δέ σοι φόβῳ πύλαι θανάτου; κἀνταῦθα τοίνυν ἄβυσσον τὰ καταχθόνια κέκληκεν. Οὐ μόνον δὲ ἀπὸ τῆς πρώτης τοῦ παντὸς δημιουργίας γνωρίζεται μέγας ὢν ὁ κύριος, ἀλλὰ καὶ ἀπὸ τῆς εἰσέτι δεῦρο ἐνεργούσης προνοίας αὐτοῦ.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.