# Commentarii in Psalmos (Tom. I: Ps 1–50) 3.7-10

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ριγʹ Νέου λαοῦ διδασκαλία. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.7-10

Κύριος ἐμνήσθη ἡμῶν καὶ εὐλόγησεν ἡμᾶς, εὐλόγησε τὸν οἶκον Ἰσραήλ, εὐλόγησε τὸν οἶκον Ἀαρών, εὐλόγησε τοὺς φοβουμένους τὸν κύριον, τοὺς μικροὺς μετὰ τῶν μεγάλων. Ἐν μὲν τῇ πρὸς τοὺς πολεμίους μάχῃ τὸν κύριον ἔχομεν ἡμεῖς οἱ φοβούμενοι τὸν κύριον ὑπερασπιστὴν καὶ βοηθόν . ἐν δὲ τοῖς οἰκείοις πράγμασι τοῖς τε κατὰ ψυχὴν καὶ κατὰ σῶμα πάλιν αὐτὸν ἔχομεν εὐλογοῦντα ἡμᾶς ὡς ἀπαρκεῖν ἡμῖν ἀντὶ τοῦ παντὸς καλοῦ καὶ ἀγαθοῦ καὶ ἀντὶ παντὸς θησαυροῦ καὶ μεγάλου κτήματος μόνον αὐτὸν τὸν κύριον καὶ πρὸς τοὺς ἐκτὸς καὶ πρὸς τὰ ἔνδον. οὕτω δὲ ἡμᾶς εὐλογεῖ νῦν, ὡς πάλαι πρότερον ηὐλόγει τὸν πρότερον λαόν· μεταβέβηκε γὰρ ἐξ ἐκείνων εἰς ἡμᾶς ἡ χάρις· εἷς γὰρ ὢν καὶ ὁ αὐτὸς κύριος καὶ τῶν παλαιῶν ὁμοίως προΐστατο ὥσπερ οὖν καὶ τῶν νέων. καὶ πάλιν τοὺς νέους ὁμοίως εὐλογεῖ ὥσπερ οὖν καὶ τοὺς παλαιούς, ὥστ’ εἶναι μίαν κλῆσιν καὶ μίαν χάριν καὶ ἕνα λαὸν τὸν ἐξ ἀμφοτέρων τῶν ταγμάτων τῷ θεῷ συνιστάμενον.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.