# Commentarii in Psalmos (Tom. I: Ps 1–50) 3.8-21

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, ρμηʹ Ὕμνος σὺν θεολογίᾳ. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.8-21

Βασιλεῖς τῆς γῆς καὶ πάντες λαοί, ἄρχοντες καὶ πάντες κριταὶ γῆς, νεανίσκοι καὶ παρθένοι, πρεσβύται μετὰ νεωτέρων, αἰνεσάτωσαν τὸ ὄνομα κυρίου, ὅτι ὑψώθη τὸ ὄνομα αὐτοῦ μόνου, ἡ ἐξομολόγησις αὐτοῦ ἐπὶ γῆς καὶ οὐρανοῦ. ἐπὶ τὴν τοῦ λογικοῦ ζῴου μεταβαίνει φύσιν προκόπτων ἐπὶ τὰ κρείττω καὶ τὴν διαστολὴν ἀκριβῆ πεποίηται. διελθὼν γὰρ τὰ ἐν ἀνθρώποις ἀξιώματα ἐπὶ τάς ἡλικίας μέτεισι καὶ ταύτας ὥσπερ ἐν χοροῖς ἀφορίσας ἐπὶ τὸν αἶνον ἀθρόως τοὺς πάντας καλεῖ τοῦ θεοῦ. τὴν μὲν οὖν ἀκμάζουσαν ἡλικίαν διαστήσας ὁμοῦ νεανίσκων καὶ παρθένων ἐμνημόνευσε, τὴν δὲ τὰ ἄκρα τῆς ἀνθρωπίνης ζωῆς περιειληφυῖαν πάλιν ὑπὸ μίαν ἄγει τάξιν πρεσβύτας μετὰ παίδων εἰπών.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.