# Commentarii in Psalmos (Tom. I: Ps 1–50) 3.9-10

Eusebius, Commentarii in Psalmos (Tom. I: Ps 1–50), Edition urn:cts:pta:pta0003.pta020.pta-grcBibex3, Ὑποθέσεις. Ancient Greek.

Canonical: https://interlinea.aeterna-institute.org/library/greek/eusebius-scr-eccl-et-theol/commentarii-in-psalmos-tom-i-ps-1-50/3.9-10

θ Ἡ ἐννάτη τῶν ἀναβαθμῶν ᾠδὴ πᾶν ἔθνος μακαρίζει τὸ προσιὸν τῷ τοῦ θεοῦ φόβῳ. διό φησι· μακάριοι πάντες οἱ φοβούμενοι τὸν κύριον, οἱ πορευόμενοι ἐν ταῖς ὁδοῖς αὐτοῦ . φοβουμένους δὲ τὸν κύριον ἑτέρους ὄντας τοῦ Ἰσραὴλ οἶδε σαφῶς ὁ λόγος ἐν τῷ φάσκοντι ψαλμῷ· εἰπάτω Ἰσραήλ, ὅτι εἰς τὸν αἰῶνα τὸ ἔλεος αὐτοῦ. εἰπάτω δὴ οἶκος Ἀαρών, ὅτι εἰς τὸν αἰῶνα τὸ ἔλεος αὐτοῦ. εἰπάτωσαν δὴ οἱ φοβούμενοι τὸν κύριον, ὅτι εἰς τὸν αἰῶνα τὸ ἔλεος αὐτοῦ . μετὰ γὰρ τὸν Ἰσραὴλ καὶ τὸν οἶκον Ἀαρὼν τὰ λοιπὰ ἔθνη σημαίνει διὰ τῶν φοβουμένων τὸν κύριον. ἀλλὰ καὶ ἐν ἑτέρῳ ψαλμῷ λέλεκται· οἶκος Ἰσραὴλ ἤλπισεν ἐπὶ κύριον , καί· οἶκος Ἀαρὼν ἤλπισεν ἐπὶ κύριον , καί· οἱ φοβούμενοι τὸν κύριον ἤλπισαν ἐπὶ κύριον , καὶ πάλιν ἑξῆς· κύριος μνησθεὶς ἡμῶν ηὐλόγησεν ἡμᾶς, ηὐλόγησε τὸν οἶκον Ἰσραήλ, ηὐλόγησε τὸν οἶκον Ἀαρών, ηὐλόγησε τοὺς φοβουμένους τὸν κύριον . εἰκότως ἄρα κατὰ καιρὸν τῆς τῶν ἐθνῶν ἐμνημόνευσε κλήσεως ἐπὶ τῆς παρούσης ᾠδῆς τῶν ἀναβαθμῶν μετὰ τὸ θεσπίσαι τὰ περὶ τοῦ χοροῦ τῶν ἱερῶν ἀποστόλων τοῦ σωτῆρος ἡμῶν.

---

Eusebius Caesariensis, Commentarii in Psalmos (Tom. I: Ps 1–50), ed. Franz Xaver Risch Editor Berlin-Brandenburgische Akademie der Wissenschaften. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg2018.tlg034.local003/.