# In Platonis Timaeum commentarii fragmenta (e cod. Scorial. Φ III 11 [ 230 Revilla]) 17

Galen, In Platonis Timaeum commentarii fragmenta (e cod. Scorial. Φ III 11 [ 230 Revilla]), Fragment 17. Ancient Greek.

Canonical: https://interlinea.aeterna-institute.org/library/greek/galen/in-platonis-timaeum-commentarii-fragmenta-e-cod-scorial-iii-11-230-revilla/17

ὅτι ὁ Πλάτων πᾶσαν ἰδέαν <τῶν> λόγων ἐπεδείξατο, κάλλιστα ποιεῖν δυνάμενος. καὶ δὴ καὶ ποιητικωτέραις ἔστιν οὗ χρῆται λέξεσι, δεῖξαι θέλων, ὅτι καὶ τὸ τοιοῦτον τῆς ἑρμηνείας εἶδος, ὃ καλοῦσιν οἱ μὲν περιττόν, οἱ δὲ ὑψηλόν, ἱκανὸς ἦν μεταχειρίζεσθαι. οὐ μὴν Σωκράτη χρώμενον αὐτῷ πεποίηκεν. ἐξ οὗ δῆλός ἐστι τὸ μὲν ἀκριβῶς κατὰ φύσιν τῆς ἐρμηνείας εἶδος ἐκείνῳ φυλάξας. τὸ περιττὸν δὲ ἑτέρως προσνείμας πάντων μέντοι τῶν ἄλλων ὧν μέμνηται σοφιστῶν τὴν ἰδέαν τῆς ἑρμηνείας ἐμιμήσατο, δηλώσας ἐν τῷδε χρῆσθαι μὲν αὐτῇ δυνάμενον ἑαυτόν, οὐκ ἀξίαν δὲ δήπου Σωκράτους νομίζοντα.

---

Galenus Med., In Platonis Timaeum commentarii fragmenta (e cod. Scorial. Φ III 11 [ 230 Revilla]). Text: The Greek Library, from the Perseus Digital Library and other open sources, CC BY 4.0. Changes: apostrophes normalised and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://thegreeklibrary.pages.lisn.upsaclay.fr/works/tlg0057.tlg097.local001/.