# In Platonis Timaeum commentarii fragmenta (e cod. Scorial. Φ III 11 [ 230 Revilla]) 33

Galen, In Platonis Timaeum commentarii fragmenta (e cod. Scorial. Φ III 11 [ 230 Revilla]), Fragment 33. Ancient Greek.

Canonical: https://interlinea.aeterna-institute.org/library/greek/galen/in-platonis-timaeum-commentarii-fragmenta-e-cod-scorial-iii-11-230-revilla/33

ὅτι τὸ βίαιον οὐκ ἔχοντα τὰ περὶ τὴν ὄψιν παθήματα· διὰ τοῦτο καὶ τῶν ἀλγημάτων ἐστὶν ἐλευθέρα κατὰ τὰς ἰδίων αἰσθητῶν διαγνώσεις. ὄψιν δὲ ἀκουστέον τὴν ὀπτικὴν δύναμιν, οὐ τὴν ἐνέργειαν αὐτῆς, ὥσπερ οὐδὲ τὸ ὄργανον, ὅπερ ἐστὶν ὀφθαλμός. οὐ γὰρ ὄψεως μόνης οὗτός γε ἀλλὰ καὶ ἁφῆς ἐστιν ὄργανον, ἥτις ὑπὸ τῶν ἰδίων αἰσθητῶν εἰς ὀδυνηρὰς ἄγεται διαθέσεις. ὥστε καθ' ὅσον ἐστὶν ὄργανον ὄψεως, οὐδὲν ὀδυνηρὸν ὑπὸ τῶν ἰδίων αἰσθητῶν πάσχει.

---

Galenus Med., In Platonis Timaeum commentarii fragmenta (e cod. Scorial. Φ III 11 [ 230 Revilla]). Text: The Greek Library, from the Perseus Digital Library and other open sources, CC BY 4.0. Changes: apostrophes normalised and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://thegreeklibrary.pages.lisn.upsaclay.fr/works/tlg0057.tlg097.local001/.