# Linguarum seu dictionum exoletarum Hippocratis explicatio 19.139

Galen, Linguarum seu dictionum exoletarum Hippocratis explicatio, Volume 19. Ancient Greek.

Canonical: https://interlinea.aeterna-institute.org/library/greek/galen/linguarum-seu-dictionum-exoletarum-hippocratis-explicatio/19.139

σκίμφθη: δύο δηλοῖ παρ' αὐτῷ, τό τε διαιρέθη καὶ τὸ ἐμπελάσθη. σκηλήματι: σκελετείᾳ, συμπτώσει. σκληρά: κατεσκληκότα καὶ τὰ ἀπ' αὐτοῦ πάντα, κατὰ τὸν αὐτὸν λόγον. σκληρύνει: σκελετεύει. καὶ σκληρύνεται, σκελετεύεται. σκορδινᾶσθαι: διατείνεσθαι καὶ μάλιστα μετὰ χάσμης. σκύρος: πῶρος, καὶ σκυρωθῶσι, πωρωθῶσι. σκύμψαι: τύψαι, κατασχάσαι, διελεῖν. σκύτα: τὰ κατὰ τὴν σκυταλίδα τοῦ αὐχένος. σμηκτίδα γῆν: τὴν κιμωλίαν. σμωδίκου: μωλωπικοῦ, τοῦ πρὸς τὰς σμώδικας, ὅπερ ἐστὶ μώλωπας, ἁρμόζοντος. σπαδών: σπάσμα, θηλυκὸν τοὔνομα. σπαργᾷ: ὀργᾷ. σπατίλη: τὸ ὑγρὸν διαχώρημα. σπέρμα: δηλοῖ καὶ τὸν καρπόν. σπερχνή: ἐπείγουσα, συνεχής.

---

Galenus Med., Linguarum seu dictionum exoletarum Hippocratis explicatio. Text: The Greek Library, from the Perseus Digital Library and other open sources, CC BY 4.0. Changes: apostrophes normalised and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://thegreeklibrary.pages.lisn.upsaclay.fr/works/tlg0057.tlg106.local001/.