# Onomasticon 1. E Iulii Pollucis onomastico (2. 157. 158). (Vide prol. § 2.)-158

Julius Pollux, Onomasticon, 1. E Iulii Pollucis onomastico (2. 157. 158). (Vide prol. § 2.) to 158. Ancient Greek.

Canonical: https://interlinea.aeterna-institute.org/library/greek/julius-pollux/onomasticon/1.%20E%20Iulii%20Pollucis%20onomastico%20(2.%20157.%20158).%20(Vide%20prol.%20%C2%A7%202.)

Τῶν δὲ μέτρων ἔϲτι μέν τι καὶ δάκτυλοϲ· δοχμὴ δὲ ϲυγκλειϲθέντεϲ οἱ τέτταρεϲ δάκτυλοι, καὶ δακτυλοδόχμη. τὸ δ᾿ αὐτὸ καὶ παλαιϲτὴ θηλυκῶϲ καὶ παλαιϲτὴϲ ἀρρενικῶϲ, καὶ δῶρον, καὶ ἑκκαιδεκάδωρα τὰ ἑκκαιδεκαπάλαιϲτα. τὸ δὲ ἀπὸ καρποῦ ἕωϲ ἄκρων δακτύλων, ἡ πᾶϲα χείρ, ὀρθόδωρον. εἰ δὲ τοὺϲ δακτύλουϲ ἀποτείναϲ ἀπὸ τοῦ μεγάλου πρὸϲ τὸν μικρότατον μετροῖϲ, ϲπιθαμὴ τὸ μέτρον· εἰ δὲ τὸν μέγαν δάκτυλον τῷ λιχανῷ ἀντιτείναϲ, τὸ μέτρον λιχάϲ. ἀπὸ δὲ ὠλεκράνου πρὸϲ τὸν μέϲον δάκτυλον ἄκρον τὸ διάϲτημα πῆχυϲ. εἰ δὲ ϲυγκάμψειαϲ τοὺϲ δακτύλουϲ, ἀπ᾿ ἀγκῶνοϲ ἐπ᾿ αὐτοὺϲ πυγὼν τὸ μέτρον, εἰ δὲ ϲυγκλείϲειαϲ, πυγμή. εἰ δ᾿ ἄμφω τὰϲ χεῖραϲ ἐκτείνειαϲ, ὡϲ καὶ τὸ ϲτέρνον αὐταῖϲ ϲυμμετρεῖν, ὀργυιὰ καλεῖται τὸ μέτρον.

---

Julius Pollux, Onomasticon, ed. Frederick Hultsch. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg0542.tlg001.local001/.