# Scholia in Lucianum (scholia vetera et recentiora Arethae) 12-3

Scholia in Lucianum, Scholia in Lucianum (scholia vetera et recentiora Arethae), Κατάπλους ἢ Τύραννος.. Ancient Greek.

Canonical: https://interlinea.aeterna-institute.org/library/greek/scholia-in-lucianum/scholia-in-lucianum-scholia-vetera-et-recentiora-arethae/12-3

ἐπεὶ τάχιστά με: ἔθος Ἀττικοῖς οὕτω χρῆσθαι ἐπὶ τῶν ἀνυπερθέτως καὶ παρευθὺς γινομένων. ἀντὶ τοῦ εἰπεῖν ‛ἐπεὶ ἀπέθανον, εὐθὺς τοῦτο εἴργασται’ εἶπεν ἐπεὶ τάχιστά με ἀποθανόντα εἶδεν, ὡς καὶ ἀλλαχοῦ ἐπεὶ τάχιστά μοι ἐξεγένετο, τόδε καὶ τόδε ἔπραξα· ἀντὶ γὰρ τοῦ ἅμα τῷ γενέσθαι εὐθὺς ἔπραξα. ~ Γ2VφUΩΔ Γλυκέριον*] ὑποκοριστικὸν τῆς Γλυκερίας Ἀθηναίων ἔθει· αὐτοὶ γὰρ τὰ θηλυκὰ ὀνόματα οὕτως ὑποκορίζονται τὴν Εὐφημίαν Εὐφήμιον λέγοντες καὶ τὴν Εὐπραξίαν Εὐπράξιον. ~ Γ2CVφUΩΔ —: Ἀττικὰ ὑποκορίσματα, ἅπερ ὡς ἐπίπαν εἰσὶν ἑταιρικά, Ἀπφίδιον, Φιλίτιον, Ψυχίδιον, Στρούθιον, Ἐρώτιον, Πώλιον, Χρυσάριον καὶ πάντα, ὅσα τῇ τῶν οὐδετέρων φωνῇ κατὰ θήλεος γένους κατηγορεῖται, ὧν ὁ χαρακτὴρ ἄνωθεν ἐμμένει Ἀττικός· μεμένηκε δὲ νῦν καὶ τῇ ἡμετέρᾳ χρήσει ἡ Φανίον, ἡ Ἁβρότιον, ἅπερ καὶ μέχρι τῶν ἑνικῶν μόνον κλίνεται. ~ V ἐπισπασάμενος* τὴν θύραν] ἐπισύρας, ἀσφαλισάμενος. ~ ΓCVΟΩΔ ἐσπόδει*] ὑβριστικῶς ἠφροδισίαζεν. ~ ΓCVΟΩΔ ἐνέτεινας*] ἐπήγαγες. ~ ΓVφ καὶ κατὰ κόρρης] καὶ κατὰ τῆς κεφαλῆς. ~ V πλατὺ χρεμψάμενος] τὸν ἐν στόματι συναγαγὼν πτύελον. ~ V ἐνεπιμπράμην*] ἐκαιόμην, ἐμαινόμην. ~ ΓVΟΩΔ εἰ*] ἀντὶ τοῦ εἴθε εὐκτικοῦ ἐπιρρήματος. ~ ὧν* εἰ λαβοίμην] καὶ τοῦτο δραματικὸν τὸ μὴ συντελεῖν ἐᾶσθαι τὸν λόγον ἀλλ’ ὑποτέμνεσθαι ἐνδεοῦς ἔτι ὄντος, ὡς καὶ ἐν τῷ βίῳ πολλάκις εἴωθε γίνεσθαι ὑπὸ μειζόνων κωλυομένου τοῦ λόγου. ~ Γ2VΟUΩΔ, cf. C — ] ὅτι τὰ κατ’ ἔλλειψιν γινόμενα τῶν διηγήσεων, οἷον τὸ ἀνακόπτειν τὸν λόγον πρὶν πέρας ἐπιθεῖναι τῷ πράγματι, δραματικά εἰσιν ἤγουν μὴ συντελεῖν κτλ. (cf. lin. 20) ~ C

---

Scholia in Lucianum, Scholia in Lucianum (scholia vetera et recentiora Arethae), ed. Hugo Rabe. Text: The Greek Library, from the Perseus Digital Library and other open sources, CC BY-SA 4.0. Changes: apostrophes normalised and the text divided into reading sections by Interlinea.
License: CC BY-SA 4.0 (https://creativecommons.org/licenses/by-sa/4.0/). Source: https://thegreeklibrary.pages.lisn.upsaclay.fr/works/tlg5029.tlg001.local001/.