Ancient Greek · ~2 min
Choral 2
Sophocles, Ἠλέκτρα 2.3
Not analysed yet
οἰκτρὰ μὲν νόστοις αὐδά,
οἰκτρὰ δʼ ἐν κοίταις πατρῴαις
ὅτε οἱ παγχάλκων ἀνταία
γενύων ὡρμάθη πλαγά.
δόλος ἦν ὁ φράσας, ἔρος ὁ κτείνας,
δεινὰν δεινῶς προφυτεύσαντες
μορφάν, εἴτʼ οὖν θεὸς εἴτε βροτῶν
ἦν ὁ ταῦτα πράσσων.
ὦ πασᾶν κείνα πλέον ἁμέρα
ἐλθοῦσʼ ἐχθίστα δή μοι·
ὦ νύξ, ὦ δείπνων ἀρρήτων
ἔκπαγλʼ ἄχθη,
τοὺς ἐμὸς ἴδε πατὴρ
θανάτους αἰκεῖς διδύμαιν χειροῖν,
αἳ τὸν ἐμὸν εἷλον βίον πρόδοτον, αἵ μʼ ἀπώλεσαν·
οἷς θεὸς ὁ μέγας Ὀλύμπιος
ποίνιμα πάθεα παθεῖν πόροι,
μηδέ ποτʼ ἀγλαΐας ἀποναίατο
τοιάδʼ ἀνύσαντες ἔργα.