Ancient Greek · ~2 min
Choral 2
Sophocles, Οἰδίπους ἐπὶ Κολωνῷ 2.2
Not analysed yet
οὔ τοι μήποτέ σʼ ἐκ τῶνδʼ ἑδράνων,
ὦ γέρον, ἄκοντά τις ἄξει.
ἔτʼ οὖν;
ἔτι βαῖνε πόρσω.
ἔτι;
προβίβαζε, κούρα,
πόρσω· σὺ γὰρ ἀΐεις.
ἕπεο μάν, ἕπεʼ ὧδʼ ἀμαυρῷ κώλῳ, πάτερ, ᾇ σʼ ἄγω.
τόλμα ξεῖνος ἐπὶ ξένης,
ὦ τλάμων, ὅ τι καὶ πόλις
τέτροφεν ἄφιλον ἀποστυγεῖν
καὶ τὸ φίλον σέβεσθαι.
ἄγε νυν σύ με, παῖ,
ἵνʼ ἂν εὐσεβίας ἐπιβαίνοντες
τὸ μὲν εἴποιμεν, τὸ δʼ ἀκούσαιμεν,
καὶ μὴ χρείᾳ πολεμῶμεν.