Ancient Greek · ~2 min
Episode 13
Sophocles, Οἰδίπους Τύραννος 13.1
Not analysed yet
ὦ δεινὸν ἰδεῖν πάθος ἀνθρώποις,
ὦ δεινότατον πάντων ὅσʼ ἐγὼ
προσέκυρσʼ ἤδη. τίς σʼ, ὦ τλῆμον,
προσέβη μανία; τίς ὁ πηδήσας
μείζονα δαίμων τῶν μακίστων
πρὸς σῇ δυσδαίμονι μοίρᾳ;
φεῦ φεῦ, δύστανʼ·
ἀλλʼ οὐδʼ ἐσιδεῖν δύναμαί σε, θέλων
πόλλʼ ἀνερέσθαι, πολλὰ πυθέσθαι,
πολλὰ δʼ ἀθρῆσαι·
τοίαν φρίκην παρέχεις μοι.
αἰαῖ αἰαῖ, δύστανος ἐγώ,
ποῖ γᾶς φέρομαι τλάμων; πᾷ μοι
φθογγὰ διαπωτᾶται φοράδην;
ἰὼ δαῖμον, ἵνʼ ἐξήλλου.
ἐς δεινὸν οὐδʼ ἀκουστὸν οὐδʼ ἐπόψιμον.