# Ald. Carm. eccl. 1

Aldhelm, Ald. Carm. eccl., Part 1. Latin.

Canonical: https://interlinea.aeterna-institute.org/library/latin/aldhelm/ald-carm-eccl/1
JSON: https://interlinea.aeterna-institute.org/api/v1/library/latin/aldhelm/ald-carm-eccl/1

I.
IN BASILICA SANCTORVM PETRI ET PAVLI.
Hic celebranda rudis florescit gloria templi,
Limpida quae sacri signat vexilla triumphi;
Hic Petrus et Paulus, tenebrosi lumina mundi,
Praecipui patres, populi qui frena gubernant,
Carminibus crebris alma venerantur in aula.
Claviger aetherius, portam qui pandis in aethra,
Candida caelorum recludens regna Tonantis,
Ausculta clemens populorum vota precantum,
Marcida qui riguis umectant imbribus ora;
Suscipe singultus commissa piacla gementum,
Qui prece flagranti torrent peccamina vitae!
Maximus et doctor, patulo vocitatus ab axe,
Cum cuperes Christo priscos praeponere ritus,
Saulus, qui dictus mutato nomine Paulus
Post tenebras claram coepisti cernere lucem,
Vocibus orantum nunc aures pande benignas
Et tutor tremulis cum Petro porrige dextram,
Sacra frequentantes aulae qui limina lustrant,
Quatenus hic scelerum detur indulgentia perpes
Larga de pietate fluens et fonte superno,
Dignis qui numquam populis torpescit in aevum!

---

Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000827.zip.
