# Ald. Carm. eccl. 4.1

Aldhelm, Ald. Carm. eccl., Part 4, I. in Sancti Petri.. Latin.

Canonical: https://interlinea.aeterna-institute.org/library/latin/aldhelm/ald-carm-eccl/4.1
JSON: https://interlinea.aeterna-institute.org/api/v1/library/latin/aldhelm/ald-carm-eccl/4.1

Hanc Petrus absidam sanctorum sorte coronat,
Claviger aethereus, qui portam pandit in aethra,
Ianitor aeternae recludens limina vitae;
Omnibus hic geminum digessit dogma per orbem,
Quod binis constat descriptum rite libellis,
Pectore qui patulo Christi praecepta capessunt.
Ut prius aequoreas captabat rete catervas
Linea squamigeris extendens vincula turmis,
Sic hominum cuneos mundi de gurgite raptos
Ducit ad aeternum caelesti remige regnum,
Ut sibi salvator vera cum voce spopondit,
Quando piscantem panda de puppe vocavit.
Qui ponti pedibus caleavit caerula glauci,
Sed mare mergentem tumidis non sorbuit undis,
Dextera dum Christi turgentia marmora pressit;
Cuius praestabat defunctis umbra medelam,
Dum sani rursus redeunt ad lumina vitae,
Quamvis ante nigrae lustrassent limina mortis.
Hic quoque poplitibus nec non et crure gemello
Claudum restaurat fretus virtute Tonantis
Et cito sanatis praecepit pergere plantis,
Quem prius ad templum gestabant forte propinqui.
Hic etiam binos multavit morte malignos,
Qui pretium fundi celarant fraude nefandum;
Insuper et magicum falsi fantasma Simonis
Funditus evacuans tetras detrusit in umbras
Romanum vulgus solvens errore vetusto,
Qui praecelsa rudis scandit fastigia turris
Atque coronatus lauri de fronde volavit,
Sed mox aethereas dimittens furcifer auras
Cernuus ad terram confractis ossibus ambro
Corruit, et Petro cessit victoria belli;
Qui cruce confixus gaudens tormenta luebat
Horrida crudelis passurus vulnera ferri;
Quem Deus aeternis ornatum iure triumphis
Arbiter omnipotens ad caeli culmina vexit.

---

Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000827.zip.
