# Ald. Carm. eccl. 4.3

Aldhelm, Ald. Carm. eccl., Part 4, III. in Sancti Andreae.. Latin.

Canonical: https://interlinea.aeterna-institute.org/library/latin/aldhelm/ald-carm-eccl/4.3
JSON: https://interlinea.aeterna-institute.org/api/v1/library/latin/aldhelm/ald-carm-eccl/4.3

Hic simul Andreas templum tutabitur ara,
Petri germanus, qui quondam funera laetus
Horrida perpessus sancta cum carne pependit.
Quem Deus oceani lustrantem flustra phasello
Caelitus adscivit gradiens per litora ponti;
Protinus Andreas compunctus voce Tonantis
Credidit aeternum salvantem saecula regem
Pendula capturae contemnens retia spretae
Et dicto citius Christi praecepta facessit.
Quis numerare valet populosis oppida turbis,
Illius eloquio quae fana profana friabant
Credula pandentes regi praecordia Christo?
Nempe vicem Domino solvebat calce cruenta,
Dum crucis in patulo suspensus stipite martyr
Ultima mortalis clausit spiracula vitae
Purpureas sumens Christo regnante coronas.

---

Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000827.zip.
