Latin · Dactylic hexameter
Part 4, V. in Sancti Iohannis Apostoli et Evangelistae.
Aldhelm, Ald. Carm. eccl. 4.5
Not analysed yet
Nec minus interea glomeretur virgo Iohannes,
Quem germana simul iunxit concordia Christo,
Dum pandam vetulo liquit cum patre carinam
Retibus aequoreas claudentem marmore praedas;
Qui prius algosis verrebat caerula remis
Piscibus insidias nectens sub gurgite ponti;
Sed clamante Deo luctantes litore limphas
Retiferamque ratem caro cum fratre relinquit
Et Dominum sequitur, caeli qui regnat in arce.
Hic fuit egregius Christi regnantis alumnus,
Omnibus anterior, magno dilectus amore;
Quem rex extorrem, Romae qui regna regebat,
Trusit in exilium cumba trans caerula vectum,
Exul qua positus rerum spectacula plura
Crevit in extasi caelesti numine fretus,
Quae modo membranis per mundum scripta leguntur.
Pausat in Effeso praefatus corpore praesul
Praemia sumptums, cum clanget classica salpix,
Ultima dum priscis labuntur tempora saeclis.