Latin · Dactylic hexameter
Part 4, VII. in Sancti Iacobi Apostoli.
Aldhelm, Ald. Carm. eccl. 4.7
Not analysed yet
Nec non Iacobus Christi matertera cretus
Et consobrini felici nomine fretus
Hanc aedem Domini de summo servat Olimpo;
Quem plebs Iudaea scaevo bachante tumultu
Pulsum de pinna fullonis sude necavit,
Quod Christum populis scandens fastigia templi
Concionaretur crebro sermone sacerdos.
In cuius genibus cutis callosa refertur,
Dum crebris vicibus oraret voce Tonantem
Poplitibus flexis tundens pavimenta sacelli.
Lanea villosi sprevit velamina pepli
Linea brumosis sumens mantilia flabris;
Sic quoque flagrantem contempnens corpore nardum
Thermarum penitus neglexit pectore pompas;
Non cirros capitis ferrata forfice dempsit
Nec culter malas vestis lanugine rasit.
Cuius virtutum tanta praeconia constant,
Ut vindicta necis, quam dira morte luebat,
Interitus fieret Solimae populique ruina,
Dum Titus Caesar densa comitante caterva
Cum genitore simul Romanis arcibus orto
Urbem ferriferis vallarent milibus amplam,
Donec dira fames consumpsit strage catervas
Moenibus obstructas et muri carcere saeptas.
Tempore quo tenerum mactavit femina natum,
Insuper assandum veribus transfixit acutis;
Quem coctum laribus crudelis mater edebat
Humanae penitus naturae iura resolvens:
Horresco referens effebi funus acerbum.
Sic vindicta crucis multavit clade nefandos,
Sic quoque Iacobi multavit passio sontes!
Undecies centena simul cecidisse leguntur
Milia per miseram moribundis civibus urbem;
Insuper et centum venduntur milia passim,
Quos rigidus ferri neglectos mucro reliquit
Et famis exigua fugerunt funera stipe.