# Ald. Carm. eccl. 4.9

Aldhelm, Ald. Carm. eccl., Part 4, IX. in Sancti Bartholomei.. Latin.

Canonical: https://interlinea.aeterna-institute.org/library/latin/aldhelm/ald-carm-eccl/4.9
JSON: https://interlinea.aeterna-institute.org/api/v1/library/latin/aldhelm/ald-carm-eccl/4.9

Ultima terrarum praepollens India constat,
Quas tres in partes librorum scripta sequestrant.
Idola quae coluit paganis dedita sacris;
Sed Bartholomeus destruxit fana profana
Effigies veterum confringens iure deorum;
Ebrea quem clamat peregrinis lingua loquelis
'Proles suspendentis aquas in nubibus atris,'
Quod signat procerum 'caelestis' dogma 'profundi,
Umida nimbosis dum stillant aethera guttis,
Ut quondam cecinit psalmorum carmine vates:
'Ecce, latex rorat tenebrosus nubibus aeris.'
Post haec martirii mercatur serta cruenta
Et sequitur Dominum pictus cum stigmate Christi:
Cuius hoc templum veneranda tuebitur ara.

---

Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000827.zip.
