# Ald. Carm. eccl. 5

Aldhelm, Ald. Carm. eccl., Part 5. Latin.

Canonical: https://interlinea.aeterna-institute.org/library/latin/aldhelm/ald-carm-eccl/5
JSON: https://interlinea.aeterna-institute.org/api/v1/library/latin/aldhelm/ald-carm-eccl/5

V.
IN SANCTI MATHIAE APOSTOLI 〈ECCLESIA〉.
Hoc sacer observat dilubrum Mathias almum,
Unus qui fertur de septuaginta fuisse
Discipulis Domini, sacrum qui dogma docebant;
Quem Deus electum signavit sorte superna,
Dum Iudas Scarioth strofa deceptus iniqua
Culmen apostolici celsum perdebat honoris
Atque fibras olidas tetro cum viscere fudit,
Cum crepuit medius laqueo suspensus ab alto,
Qui Dominum lucis redimentem sanguine saecla
Vendidit, ut cupidus fulvum nomisma capessat.
Mathias idcirco spreto latrone nefando
In Domino fretus numerum supplevit eundem:
Iunctus apostolicis gratatur iure triumphis.

---

Aldhelm, Ald. Carm. eccl.. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.
License: CC BY 4.0 (https://creativecommons.org/licenses/by/4.0/). Source: https://data.mgh.de/openmgh/bsb00000827.zip.
